Памёр вядоўца "Белорусского времечка" і dj "Радыё Рокс" Сяргей Прохараў

У суботу, 8 ліпеня памёр вядоўца праграмы "Белорусское времечко" на "Беларусь 2" і dj "Радыё Рокс" Сяргей Прохараў. Яму было ўсяго 53 гады.

Паведамленне пра смерць Сяргея Прохарава з'явілася на афіцыйнай старонцы "Радыё Рокс" у Facebook:

"Сяргея Прохарава больш няма. Немагчыма паверыць, але гэта, на жаль, праўда. Пайшоў з жыцця наш Барысыч, разумніца, энцыклапедыст, весялун з сумнымі вачыма і проста класны мужык; голас "Радыё Рокс", а для вельмі многіх — яго сэрца і душа", — пішуць пра смерць калегі супрацоўнікі "Радыё Рокс".

"Развітанне адбудзецца ў аўторак, 11 ліпеня, з 12:00 да 14:00 у Рытуальным зале па адрасе: Навінкі, Далігнаўскі тракт, 160а", — удакладняе ў сваім Facebook-акаўнце Белтэлерадыёкампанія.

Сяргей Прохараў нарадзіўся 20 чэрвеня 1964 года ў Мінску. У 1988 годзе скончыў Інстытут культуры і застаўся там выкладаць. Але ў пачатку 1990-х вырашыў паспрабаваць сябе ў якасці радыёвядоўцы. У 1993 годзе стаў дыджэем на радыё "Бі-Эй", а ў 1997 годзе перайшоў на "Радыё Рокс", дзе адпрацаваў 20 гадоў.