Пад Віцебскам знайшлася магіла ката Леапольда (фота)
Хоць гэта і не герой вядомага мультфільма. Гэтая магіла знаходзіцца на стыхійных могілках жывёл.
Як пішуць "Народныя навіны Віцебска", могілкі знаходзяцца на ўскраіне парку адпачынку імя Чырвонай Арміі ў Мазурыне пад Віцебскам. У пяску пад хвоямі знайшлі апошні прытулак хатнія гадаванцы, якіх пасля смерці гаспадары не захацелі ўтылізаваць.
Паводле дзейсных нарматыўных актаў, у Віцебску няма могілак для жывёлаў. На палігоне цвёрдых адкідаў адведзены спецыяльны ўчастак для пахавання трупаў вандроўных жывёлаў і тых, каго гаспадары ўсыпілі ў ветэрынарных клініках.
Дарэчы, у нашай краіне дагэтуль няма афіцыйных могілак для жывёлаў ні ў адным горадзе.
Фота — news.vitebsk.cc
