Нацыянальны аэрапорт Мінск мяняе правілы дагляду ручной паклажы
Нацыянальны аэрапорт Мінск мяняе правілы дагляду ручной паклажы. Як паведамляе БЕЛТА са спасылкай на прэс-службу аэрапорта, з 1 траўня тут укараняецца сістэма аўтаматычнага звароту латкоў у пунктах дагляду. Цяпер усю ручную паклажу будуць змяшчаць у спецыяльныя латкі і ў іх накіроўваць на праверку ў інтраскоп. Дагляд паклажы без выкарыстання латка будзе немагчымым.
Пасажыры, у якіх ручная паклажа не змяшчаецца ў латок, мусяць вярнуцца на стойку рэгістрацыі і здаць багаж.
Паводле патрабаванняў Міжнароднай асацыяцыі паветранага транспарту максімальна дапушчальныя памеры ручной паклажы складаюць 56/45/25 см. У кампаніі “Белавія” яны крыху меншыя — 55/40/20 см.
Для асобных катэгорыяў ручной паклажы (балетныя пачкі, музычныя інструменты) парадак дагляду застанецца ранейшы.
