На рамонт камунальнай аварыі ў Рэчыцы спатрэбіліся тры дні
На месцы камунальнай аварыі ў Рэчыцы / Дняпровец
Тры дні спатрэбіліся камунальнікам Рэчыцы, каб справіцца з прарывам на цэнтральным калектары агульнай каналізацыі.
Як адзначае выданне "Флагшток", першая аварыя здарылася 9 сакавіка ў раёне пуцеправода з боку былога тубдыспансера. Аднавіць працу сістэмы камунальнікі здолелі на наступны дзень.
Другая аварыя здарылася ўдзень 11 сакавіка і была больш сур'ёзнай. На скрыжаванні вуліц Савецкай і Красікава праваліўся асфальт, калі на цэнтральным калектары адбыўся пралом трубы на глыбіні 5 метраў.
Справіцца самастойна з аварыяй "Рэчыцаводаканал" не здолеў: давялося прыцягваць тэхніку іншых прадпрыемстваў і "Беларуснафты". Сітуацыю ўскладняла тое, што паблізу ад месца аварыі пралягаў кабель "Белтэлекама".
Толькі зранку 13 сакавіка ўлады паведамілі, што замена пашкоджанага ўчастка трубы на калектары завершана, а земляныя работы працягнуцца: "Тэрыторыя абгароджаная, магчымая ўсадка грунту. Аварыйныя службы манітораць працу калектара".
"Флагшток" адзначае, што камунальныя аварыі на гэтых участках здараюцца пастаянна.
