Мядзведзеў паведаміў Румасу, што ў Расіі няма "антыбеларускіх элементаў"

"Інтэграцыйныя працэсы так уладкаваныя, што заўсёды суправаджаюцца абмеркаваннем, выказваннем меркаванняў, часам эмацыйных пазіцый. Я вось сёння прачытаў пра тое, што ў нас дзесьці ёсць"антыбеларускія элементы", якія так ці інакш уплываюць на дзяржаўную палітыку. Хачу вам прама сказаць, і я скажу пра гэта прэзідэнту Беларусі Аляксандру Лукашэнку, што ў нас такіх "антыбеларускіх элементаў" няма", — прыводзіць ТАСС словы расійскага прэм'ера.

Мядзведзеў падкрэсліў, што паміж Масквой і Мінскам "захоўваюцца нейкія пытанні". На яго думку, гэта натуральна, бо падчас інтэграцыі закранаецца каласальнае кола тэмаў. "Было б дзіўна, калі б мы на сябе ўзвалілі абавязак дамовіцца па ўсіх пазіцыях", — пракаментаваў ён.

Расійскі прэм'ер дадаў, што вырашыць усе пытанні было б немагчыма. Менавіта таму заўтра будуць сустракацца Аляксандр Лукашэнка і Уладзімір Пуцін.

Пасля гэтага Мядзведзеў прапанаваў Румасу перад заўтрашняй сустрэчай кіраўнікоў дзвюх дзяржаваў "прабегчыся па дарожных картах, па тых пытаннях, якія яшчэ не ўзгодненыя".