"My cup, please!" У Мінску пачалася кампанія супраць аднаразовых кубачкаў

Штодня толькі ў Мінску прадаюцца сотні літраў кавы "з сабой". Звычайна напой наліваюць у аднаразовыя кубачкі. А як толькі кава знікае з кубачка, ён робіцца смеццем.

Аднаразовыя шкляначкі многія лічаць зручнымі, прыгожымі і бяспечнымі, але для эколагаў гэта сапраўдная катастрофа. На іх вытворчасць ідзе шмат рэсурсаў. Пры іх дастаўцы ў Беларусь утвараецца "транспартны след". А пасля ўжывання яны ператвараюцца ў адходы, якія немагчыма або складана перапрацаваць. Вось яна, цана дзесяці хвілінаў з кавай у руках.

Як паменшыць колькасць смецця і пасябраваць з экалогіяй горада? Выкарыстоўваць шматразовыя кубкі! Кампанію "My cup, please!" за тое, каб купляць напоі навынас у свае кубкі, распачалі выпускніцы моладзевага адукацыйнага цэнтра "Экастарт" пры падтрымцы Цэнтра экалагічных рашэнняў і таварыства "Зялёная сетка".

"My cup, please!" У Мінску пачалася кампанія супраць аднаразовых кубачкаў

Інфаграфіка: ecoidea.by

Актывісты "Экастарта" нават склалі карту месцаў, дзе вам дакладна не адмовяцца наліць кавы ў ваш кубак. Тым больш, што санітарныя нормы гэтага не забараняюць.

Посуд "мусіць быць выраблены з матэрыялаў, дазволеных для прымянення пры кантакце з прадуктамі харчавання; паверхні посуду павінны быць гладкімі, без шчылін, дэфектаў, зазораў, заклёпванняў, якія выступаюць, і іншых элементаў, якія абцяжарваюць санітарную апрацоўку, — сказана ў адказе, якія эколагі атрымалі з Мінздароўя. — Не дапускаецца выкарыстанне ёмістасцяў, посуду з пашкоджаным пакрыццём, адбітымі бакамі, дэфармаваных, з расколінамі і іншымі дэфектамі. Іншых санітарна-гігіенічных і эпідэміялагічных патрабаванняў, што прад'яўляюцца да посуду для напояў і ежы ў аб'ектах грамадскага харчавання, няма"

Як тлумачыць супрацоўніца Цэнтра экалагічных рашэнняў Наталля Блышчык, нават аднаразовыя папяровыя кубачкі — гэта неэкалагічна. Унутры яны пакрытыя плёнкай, якую вельмі складана аддзяліць ад паперы. Таму іх не перапрацуюць, нават калі вы выкінеце іх у макулатуру.

Пластыкавая аднаразовы посуд, акрамя таго, што не перапрацоўваецца, дык можа ўяўляць небяспеку для здароўя. Некаторыя віды пластыка вылучаюць шкодныя рэчывы, калі датыкаюцца да гарачага.