Мінінфарм ануляваў "Газеце Слонімскай" пасведчанне аб дзяржрэгістрацыі
Чыноўнікі абгрунтоўваюць сваё рашэнне тым, што выпуск выдання не здзяйсняўся на працягу шасці месяцаў запар.
Мінінфарм ануляваў недзяржаўнай "Газеце Слонімскай" пасведчанне аб дзяржрэгістрацыі. Як паведамляе @bajby, чыноўнікі абгрунтоўваюць сваё рашэнне тым, што выпуск выдання ("ГС" і рэкламнай газеты "Отдушина") не здзяйсняўся на працягу шасці месяцаў запар. У рэдакцыі ж кажуць, што недзяржаўную газету адмовіліся друкаваць друкарні ў Гродне, Брэсце і Пінску. Яны спасылаліся "на высокую ступень загружанасці" і "шчыльны графік друку".
"Газета Слонімская" — рэгіянальнае выданне, якое было заснавана вясной 1997 года былым рэпарцёрам газеты "Свабода" Віктарам Валадашчуком. З таго часу яна выходзіла штотыднёва. У 2019-м Валадашчук памёр у 61 год пасля цяжкай хваробы. Друкаваная версія "ГС" (як і газеты "Отдушина") перастала выходзіць у лістападзе 2020 года. Здарылася гэта пасля ператрусаў і пагрозы крымінальнай справы. У чэрвені 2021-га стала вядома, што друкарні адмовіліся друкаваць недзяржаўныя газеты. Абнаўляўся толькі сайт. Сёлета Міністэрства інфармацыі абмежавала доступ да яго.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.