Microsoft працуе над новай Windows — для "Інтэрнэту рэчаў"
Так выглядае "Інтэрнэт рэчаў" / www.sheremetev.info
Аперацыйная сістэма для IoT будзе створаная на аснове Windows 10X.
Карпарацыя Microsoft працуе над новай аперацыйнай сістэмай на базе Windows, прызначанай для "Інтэрнэту рэчаў" (Internet of things). Выснову пра гэта аналітыкі зрабілі па вакансіі, якую Microsoft размясціла ў прафесійнай сеткі LinkedIn.
Кампанія шукае інжынера, які "створыць аперацыйную сістэму IoT наступнага пакалення на аснове Windows 10X". Аднак верагодна, што ў Microsoft маюць на ўвазе не Windows 10X, толькі анансаваную ў кастрычніку 2019 года аперацыйную сістэму, якая зможа працаваць на прыладах з двума экранамі, а Windows Core OS, якая з'яўляецца свайго роду асновай для Windows 10X.
"Інтэрнэт рэчаў" — сетка прадметаў (бытавых прыбораў, гаджэтаў і г.д.), абсталяваных тэхналогіямі для ўзаемадзеяння адно з адным ці з вонкавым асяроддзем. Прыклады IoT — "разумны дом" і "разумны горад", "смарт-лядоўні" і Smart TV.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.