Вы тут

Львоў вяртае эвакуатары МАЗу, бо ў іх — дэталі "краіны-агрэсара"

Эвакуатары МАЗ / Львоўская гарадская рада

Улады Львова купілі на ўмовах лізінгу тры беларускія эвакуатары вытворчасці МАЗа. Але пасля агляду і тэставага выпрабавання аднаго з іх у Львове выказалі шмат заўваг да тэхнічных і нарматыўных характарыстык машыны. Камісія вырашыла вярнуць тэхніку пастаўшчыку, піша Zaxid.net са  словаў намесніка мэра Львова па пытаннях бяспекі горада Сяргея Бабака.

Акрамя тэхнічных заўваг камісія высветліла, што некаторыя агрэгаты рухавіка і хадавой часткі вырабленыя ў Расіі. Між тым раней вытворцы заяўлялі, быццам машыны зробленыя выключна з беларускіх камплектуючых.

"Беручы пад увагу ​​тэхнічныя заўвагі і заканадаўчыя акты, якія забараняюць гандаль з краінай-агрэсарам, лічым недапушчальным выкарыстанне такой тэхнікі ў Львове", — падкрэсліў Бабак. Па яго словах гарадскія ўлады запатрабуюць або замяніць тэхніку, каб яна адпавядала тэхнічным і эксплуатацыйным нарматывам, або вярнуць авансавы плацеж.