Лукашэнка заўважыў, што ад'езд айцішнікаў "усё ж назіраецца", і ён немалы
![Лукашэнка прымае з дакладам чыноўнікаў / БЕЛТА](/sites/default/files/styles/gallery_main/public/2023-08/lu_4_04.jpg.webp?itok=i87FdcOL)
Лукашэнка прымае з дакладам чыноўнікаў / БЕЛТА
Аляксандр Лукашэнка зноў загаварыў пра праграмістаў і IT. У панядзелак ён прымаў з дакладам кіраўніка Нацыянальнай акадэміі навук Беларусі Уладзіміра Гусакова і міністра сувязі і інфармацыі Канстанціна Шульгана.
"Працэс ад'езду некаторых айцішнікаў ўсе ж назіраецца, і, магчыма, ён не малы. Нам трэба паглядзець з пункту гледжання бяспекі, наколькі гэта небяспечна для Беларусі", — заявіў Лукашэнка. Ён хоча "ўсё ж такі разабрацца з IT-тэхналогіямі, IT-паркамі і з гэтымі айцішнікамі, каб у нас былі роўныя ўмовы для ўсіх". Паводле яго слоў, прыйшоў час вырашаць гэтыя пытанні. Ён папрасіў сваіх суразмоўцаў расказаць, што адбываецца ў ПВТ і наколькі там моцная тэндэнцыя да адтоку кадраў.
Раней Лукашэнка неаднаразова крытычна выказваўся пра прадстаўнікоў IT-галіны, якія падтрымалі пратэсты ў 2020 годзе. "Мы стваралі IT-парк: "Ах, трэба, ах, добра!"... І што атрымалі: самыя быццам прасунутыя, самыя багаценькія і забяспечаныя — дзе яны апынуліся?" — казаў ён, у прыватнасці, у чэрвені 2021 года. Акрамя таго, Лукашэнка анансаваў павелічэнне падаткаў для рэзідэнтаў ПВТ, казаў пра тое, што, магчыма, "прыйшоў час паставіць нашых айцішнікаў у роўныя ўмовы".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.