Вы тут

Лукашэнка расказаў, ці могуць адмяніць рэферэндум па Канстытуцыі

Аляксандр Лукашенка / Reuters

Праект новай Канстытуцыі будзе апублікаваны "да Новага года", заявіў Аляксандр Лукашэнка ў інтэрв'ю кіраўніку расійскага агенцтва навін Дзмітрыю Кісялёву. Праект, паводле яго слоў, у яго на стале.

"Цяпер я сяджу і гляджу. І кожны радок",прыводзіць цытату Лукашэнкі БЕЛТА.

Пры гэтым уласна рэферэндум запланаваны на люты. Гэта значыць на азнаямленне і грамадскае абмеркаванне застанецца месяц-паўтара. Кісялеў спытаў у Лукашэнкі, ці сапраўды рэферэндум адбудзецца ў лютым. "Калі не пачнецца вайна", адказаў кіраўнік беларускай дзяржавы.

Рэферэндум адбудзецца, калі "калі вы (знешнія сілы, удакладняе БЕЛТА) нас не паставіце перад увядзеннем нейкага надзвычайнага становішча. Але гэта з вобласці фантастыкі. Таму я думаю, што ў лютым у нас па графіку, як мы запланавалі, атрымаецца правесці".

Лукашэнка таксама распавёў Кісялёву, што ў абноўленай Канстытуцыі ўзмацняецца роля ўрада і парламента, а Усебеларускі народны сход атрымае канстытуцыйны статус. Пры гэтым "моцная прэзідэнцкая ўлада застаецца".

Эксперты і палітолагі лічаць, што за ідэяй канстытуцыйнай рэформы ў Беларусі стаіць Расія. Масква разглядае гэта як магчымасць арганізаваць транзіт улады ў Беларусі без удзелу "вуліцы". Ва ўсякім выпадку восенню 2020 года расійскі прэзідэнт Уладзімір Пуцін вельмі пахвальна адгукаўся аб ініцыятыве правесці плебісцыт. "Лічу, гэта лагічна, своечасова, мэтазгодна", казаў ён.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.