Лукашэнка: дакумент сфальсіфікаваны, што ў яго нуль праміле!

Што ж цяпер сказаў Лукашэнка? Вось што прагучала ў эфіры тэлеканала "Беларусь 1": "На раніцу Сарокін гэты скідвае на TUT.by (TUT.by, так?) дакумент сфальсіфікаваны, што ў яго [Рамана Бандарэнкі] нуль праміле. І вось некаторыя тут стаяць і посцяцца з гэтым "нуль праміле" [пра акцыі салідарнасці]. Ну ты навошта гэта робіш, навошта ты фальсіфікуеш факты?! Ну быў выпіўшы, быў п'яны [Бандарэнка]. Навошта? Ніхто на яго [на Сарокіна] не ціснуў. Слухайце, каб не было ніякага ціску, не парушайце закон".

Мастак Раман Бандарэнка быў збіты ўвечары 11 лістапада на "Плошчы перамен" невядомымі і вывезены імі ж у Цэнтральнае РУУС беларускай сталіцы. Уначы ў цяжкім стане яго даставілі ў бальніцу хуткай меддапамогі. 12 лістапада ўвечары ён памёр. Справа Бандарэнкі набыла розгалас і ў Беларусі, і ў замежжы. Дзіўна, што ўлады нашай краіны вельмі хвалюе пытанне пра тое, быў ён п'яны ці не. У той жа час дагэтуль не затрыманыя асобы, якія яго збівалі.

Днямі Генпракуратура апублікавала відэазварот Арцёма Сарокіна. Доктар кажа, што "на яго ніхто не цісне". Перадачу медыцынскай дакументацыі ён назваў сваёй памылкай. Але на відэа ён не гаварыў пра "фальсіфікацыю". Упершыню пра гэта загаварыў Лукашэнка.