Лідар Oomph! беларускім фанатам: вы лепшыя за нямецкую публіку!
Нямецкі гурт Oomph! — сапраўдная легенда, хоць і меншага маштабу, чым іх калегі гурт Rammstein.
Учора стваральнікі музычнага жанра пад назвай "новая нямецкая цяжкасць" далі свой першы за больш чым 25 гадоў існавання канцэрт у Беларусі.
Мінск стаў першым не нямецкім горадам у канцэртным туры ў падтрымку новага альбома "XXV", які выйшаў у ліпені гэтага года.
Па чарзе на ўваходзе ў мінскі клуб Re:public, па паўнюткім танцпляцы было бачна, што немцаў беларускія фанаты чакалі даўно і па-сапраўднаму. І, гледзячы па ўсім, Oomph! гэта заўважылі. Вакаліст каманды Дэра Гоі па-беларуску падзякаваў гледачам, а потым, праз некалькі песень, выдаў: "Да сённяшняга канцэрта ў нас былі чатыры выступы ў Германіі, і вось цяпер я вымушаны прызнаць, што вы значна лепшыя за нямецкую аўдыторыю. Вы гучнейшыя, вы больш жывыя і вы значна прыгажэйшыя!"
Хаця фармальна канцэртны тур праходзіць у падтрымку альбома "XXV", але з яго нямецкія музыкі сыгралі толькі чатыры ці пяць песень, зрабіўшы ўпор на правераныя часам хіты "Labyrinth", "Gott ist ein Popstar", "Niemand", "Sandman", "Augen auf!" ды нават "Mein Herz" з першага альбома.
