У Беларусі створаць рэестр выканаўцаў і іншых творчых работнікаў

У Беларусі плануецца стварыць рэестр выканаўцаў і іншых творчых работнікаў, якія адказваюць за распрацоўку і рэалізацыю сцэнарыяў. Адпаведныя прапановы пададзеныя ва ўрад, заявіў міністр культуры Анатоль Маркевіч.

"У мэтах абароны гледачоў ад нядобрасумленных арганізатараў мерапрыемстваў з 2023 года работа па правядзенні гастроляў замежных выканаўцаў сканцэнтраваная ў руках філармоній і іншых буйных дзяржаўных канцэртных арганізацый. Ва ўрад унесеныя прапановы пра стварэнне рэестра выканаўцаў і іншых творчых работнікаў, якія адказваюць за распрацоўку і рэалізацыю сцэнарыяў", — цытуе БЕЛТА словы міністра.

Дарэчы, дзеля рэгулявання канцэртнай дзейнасці з 1 жніўня 2022 года ў Беларусі ўведзены рэестр арганізатараў культурна-відовішчных мерапрыемстваў.

Як распавядала Еўрарадыё, 22 лютага кіраўнік Адміністрацыі прэзідэнта Ігар Сергеенка заявіў, што ўсе работнікі ўстаноў культуры ў краіне сталі "байцамі ідэалагічнага фронту".