Крамы "Востраў чысціні і густу" не працуюць праз праблемы з абсталяваннем
![Дыскаўнтар "Востраў чысціні" / Яндэкс](/sites/default/files/styles/gallery_main/public/2023-08/vostrau-0201.jpg.webp?itok=R4OAMjDA)
Дыскаўнтар "Востраў чысціні" / Яндэкс
У Беларусі 2 студзеня зачыненыя некаторыя крамы гандлёвых сетак "ОМА", "Востраў чысціні і густу", а таксама "Мацярык". Прычынай сталі праблемы з касавым абсталяваннем, піша zerkalo.io.
"З самай раніцы няма магчымасці на касе адкрыць змену — праблемы з касавым абсталяваннем, якое пастаўляе і абслугоўвае "Тусон". Фіскальны рэгістратар не ўстанаўлівае бягучы час на касе, супрацоўнікі "Тусона" вырашыць праблему не могуць", — паведаміў ананімна адзін з супрацоўнікаў сеткі "Востраў чысціні і густу".
З такімі праблемамі сутыкнуліся не толькі жыхары сталіцы. У Гомелі, як кажуць мясцовыя жыхары, аналагічная праблема ў крамах сеткі "ОМА". У самой сетцы кажуць, што праблему ўжо часткова выправілі: пакупнікі могуць аплаціць пакупкі карткамі на касах самаабслугоўвання.
У крамах сеткі "Еўраопт" пакупнікі скардзяцца, што не могуць аплаціць пакупкі ні гатоўкай, ні па картках. "Але працуе каса самаабслугоўвання!" — кажуць жыхары Асіповічаў.
Таксама карыстальнікі кажуць пра падобныя праблемы ў крамах "Спортмайстар", на некаторых запраўках сеткі "Газпрамнафта" і "Беларуснафта".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.