Італія прыпыняе выдачу "залатых віз" беларусам і расіянам
![Італія / pixabay](/sites/default/files/styles/gallery_main/public/2023-08/houses-4093227_1920.jpg.webp?itok=gAPaEixs)
Італія / pixabay
Італія прыпыняе выдачу "залатых віз" для грамадзян Беларусі і Расіі, піша мясцовае выданне Affaritaliani. Еўракамісія рэкамендавала зрабіць гэта адразу пасля ўварвання Расіі ва Украіну.
Залатая віза — гэта магчымасць атрымаць від на жыхарства ў краіне праз інвестыцыі. Від на жыхарства ў Італіі беларусы маглі атрымаць пасля куплі нерухомасці або буйной інвестыцыі ці ахвяравання.
Еўракамісія меркавала, што праграмы такога кшталту "маглі і могуць прывесці да прывілеяванага доступу на тэрыторыю і ўнутраны рынак Еўрапейскага саюза і да перамяшчэння ў межах Шэнгенскай зоны грамадзян Расіі ці Беларусі, якія трапляюць або будуць трапляць пад дзеянне санкцый ЕС".
Больш за год таму камісія прапанавала Італіі і іншым краінам-сябрам ЕС прыпыніць гэтыя праграмы для расіян і беларусаў. У рэкамендацыі падкрэслівалася, што не павінна ставіцца пад пагрозу магчымасць уехаць у Італію для тых грамадзян Беларусі і Расіі, якія шукаюць у ЕС міжнароднай абароны.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.