Інфаркт у шумным раёне і хлопчык, які пасадзіў 17 тысяч дрэў — #ІхНоравы

30/08/2024 - 15:28

Замежныя навіны / @rubanau_collage

Навукоўцы высветлілі, што жыццё ў шумных раёнах можа давесці чалавека да інфаркту. Тым часам японскія ўлады эвакуююць мільёны жыхароў, якія цярпяць ад моцнага тайфуну "Шаньшань". Некалькі чалавек ужо загінула.

Але ёсць і добрыя навіны: у Германіі 11-гадовы хлопчык пасадзіў лес велічынёй з тры футбольныя палі, а ў Чэхіі дзеці любяць хадзіць у школу, бо маюць даверлівыя адносіны з настаўнікамі і іншымі вучнямі.

Падрабязней пра гэта чытайце ў нашай традыцыйнай рубрыцы “Іх норавы”.

Дзіця, якое пасадзіла лес

— Я хачу абараніць клімат з дапамогай дрэў, таму і пасадзіў лес! — кажа юны экаактывіст Лені Краўт. Хлопчыку 11 гадоў, ён жыве ў Германіі. У сваім узросце ён пасадзіў ажно 17 тысяч дрэў. Пры гэтым усё арганізаваў практычна самастойна.

— Спачатку я звярнуўся да нашага бургамістра — нельга ж саджаць дрэвы дзе захочацца. Пасля пачаў збіраць грошы.

За тры гады хлопчыку ўдалося назбіраць каля 30 тысяч еўра ад людзей, якім спадабаўся гэты праект. Яго родны горад павялічыў суму да 40 тысяч і даў зямлю на пасадку лесу велічынёй з тры футбольныя палі.

— Гэта сенсацыйна. Я працую лесніком ужо 30 гадоў, і ў мяне ніколі не было магчымасці зноў засадзіць лесам такую вялікую тэрыторыю, — кажа ляснік, які дапамог хлопчыку выбраць саджанцы.

Пройдзе шмат гадоў, пакуль дрэвы Лені стануць вялікімі, але ўжо цяпер яны забіраюць вуглякіслы газ з паветра і дапамагаюць клімату.

Інфаркт у шумным раёне

Вонкавы шум можа негатыўна ўплываць на сардэчна-сасудзістую сістэму. Пра гэта кажуць даследаванні, прадстаўленыя на канферэнцыі Еўрапейскага таварыства кардыялогіі ў Лондане.

Першае даследаванне, праведзенае навукоўцамі пад кіраўніцтвам Хаціма Керніса з Інстытута кардыялагічных даследаванняў у Брэмене, сцвярджае, што гукі будаўнічых работ, аўтамабільных сігналаў ці шум натоўпу могуць стаць пастаяннай крыніцай стрэсу і павялічыць імавернасць сардэчнага прыступу.

Група даследчыкаў на чале з Марыян Зэлер з Універсітэта Бургундыі засяродзілася на пацыентах, якія перанеслі інфаркт як мінімум 28 дзён таму. У выніку высветлілася, што ў тых, хто жыў ва ўмовах пастаяннага шуму, зафіксаваная павышаная імавернасць смерці, інсульту, стэнакардыі, паўторнай шпіталізацыі з сардэчнай недастатковасцю або неабходнасці экстраннага лячэння.

— Нашы вынікі — гэта першае пацверджанне таго, што шум можа уплываць на прагноз выжывальнасці, — адзначылі навукоўцы.

Тайфун у Японіі

Улады Японіі заклікалі эвакуявацца больш за два мільёны жыхароў. Гэта наступствы тайфуну "Шаньшань", ад якога ўжо пацярпела больш за 100 чалавек. Як мінімум чатыры чалавекі загінулі.

Паводле апошніх звестак, тры ахвяры зарэгістраваныя ў прэфектуры Айці ў выніку сходу апоўзня на жылы будынак. Акрамя таго, у прэфектуры Такусіма загінуў 80-гадовы мужчына пасля падзення з даху. Больш за 90 чалавек атрымалі траўмы.

30 жніўня тайфун "Шаньшань" скіраваўся на паўночны ўсход японскіх астравоў. Метэаролагі прагназуюць, што на выходных мноства рэгіёнаў сутыкнецца з моцнымі дажджамі і парывістым ветрам. У некаторых месцах зафіксаваны анамальна высокі ўзровень ападкаў.

Школьная любоў

Дзве траціны дзяцей у Чэхіі з задавальненнем ходзяць у школу. Часцей за ўсё вучыцца не падабаецца дзецям з бедных сем'яў. Пры гэтым школьнае жыццё і адзнакі, якія атрымліваюць вучні, уплываюць на тое, наколькі яны шчаслівыя.