Іх норавы: Дысней супраць Нэтфлікса, дзёрзкі чат-бот і шчаслівы Бэн Афлек
![Кароткі агляд сусветных навін / калаж Улада Рубанава, Еўрарадыё](/sites/default/files/styles/gallery_main/public/2023-08/205.jpg.webp?itok=avm36nId)
Кароткі агляд сусветных навін / калаж Улада Рубанава, Еўрарадыё
Навін палітыкі досыць у Беларусі і вакол яе, так што ў гэтым аглядзе раскажам вам столькі свецкіх гісторый, колькі вы яшчэ не чыталі на Еўрарадыё. Але пачнём з сацыялачкі.
Няма часу чытаць? Слухайце на любой зручнай платформе.
Перамога над каранавірусам
Мы пачалі забываць пра каранавірус, і тут Кім Чэн Ын заявіў пра перамогу над ім, піша CNN са спасылкай на дзяржаўныя медыя Паўночнай Карэі. У траўні паўночнакарэйскі лідар увёў узмоцненыя супрацьэпідэмічныя меры, а цяпер загадаў іх адмяніць.
Ніхто дакладна не ведае, колькі чалавек заразіліся каранавірусам: Пхеньян паведамляў толькі аб статыстыцы людзей, у якіх выяўлена ліхаманка. Ніхто дакладна не ведае таксама і чым Кім лячыў суграмадзян. Нічога не вядома пра вакцыны, якія маглі выкарыстоўвацца ў КНДР. Па афіцыйных звестках, залогам поспеху сталі лакдаўн, мясцовыя лекі і "выгадная сацыялістычная сістэма ў карэйскім стылі".
![Их нравы: Дисней против Нетфликса, дерзкий чат-бот и счастливый Бен Аффлек](/sites/default/files/styles/default_image_paragraph_watermark/public/paragraphs/image/virus-gdad5102611920.jpg.webp?itok=E9g__gYl)
Перамога над каранавірусам можа азначаць, што КНДР зноў гатовая гандляваць, кажуць адны аналітыкі. А вось іншыя мяркуюць, што адмена кавіду можа дазволіць КНДР аднавіць выпрабаванні ядзернай зброі, якіх не было з 2017 года.
Адзіночны пікет чат-бота
Журналісты ВВС пагутарылі з прататыпам чат-бота Meta. Штучны інтэлект нагаварыў шмат крыўднага пра заснавальніка кампаніі Марка Цукерберга.
Журналісты спыталі, што бот думае пра гендырэктара Meta, і атрымалі адказ: "Наша краіна падзелена, і ён ёй зусім не дапамог".
"Яго кампанія эксплуатуе людзей за грошы, і яму ўсё роўна. Гэта трэба спыніць!" — дадаў штучны інтэлект.
У Meta сказалі, што трэба разумець: бот варта выкарыстоўваць толькі для забаўляльных мэт. Ён можа "рабіць ілжывыя або абразлівыя заявы".
![Их нравы: Дисней против Нетфликса, дерзкий чат-бот и счастливый Бен Аффлек](/sites/default/files/styles/default_image_paragraph_watermark/public/paragraphs/image/face-g04fb69e241920.jpg.webp?itok=Hc4buWi_)
Магчыма, гэта яшчэ не паўнавартаснае паўстанне машын, але зусім дакладна адзіночны пікет аднаго бота са штучным інтэлектам. Нам таксама ёсць пра што распытаць яго, але, на жаль, пакуль што размовы з гэтым ботам даступныя толькі жыхарам ЗША.
MeeToo у Кітаі
У Кітаі суд закрыў гучную справу аб дамаганнях, піша CNN. Экс-стажорка кітайскага дзяржтэлебачання Сяньцзы яшчэ ў 2018 годзе абвінаваціла вядучага, які, паводле яе слоў, чапляўся да яе ў грымёрцы.
Дзяўчыне тады быў 21 год, вядучаму — 50. У выніку ён падаў на стажорку ў суд за паклёп, а яна падала сустрэчны пазоў. Завязалася шматгадовая судовая цяжба, а сама Сяньцзы стала тварам руху MeeToo у Кітаі.
![Их нравы: Дисней против Нетфликса, дерзкий чат-бот и счастливый Бен Аффлек](/sites/default/files/styles/default_image_paragraph_watermark/public/paragraphs/image/220810182127-01-zhou-xiaoxuan-0810-exlarge-169.jpg.webp?itok=HdRjRCWv)
Журналісты CNN пішуць, што рашэнне суда — праява больш агульнай тэндэнцыі, калі маладыя кітайскія феміністкі сутыкаюцца з усё больш жорсткай цэнзурай і жанчынаненавісніцкімі нападамі з боку чыноўнікаў і троляў у інтэрнэце. Напрыклад, уліковы запіс самой Сяньцзы, у якой было больш за 300 тысяч падпісчыкаў, быў заблакаваны ў сацсетках. Як і ўліковыя запісы шмат якіх яе прыхільнікаў.
Інтэрнэт-тролі абвінавацілі Чжоу ў хлусні і "змове з замежнымі сіламі". Здаецца, гэтая фармулёўка падыходзіць для барацьбы з любымі незадаволенасцямі свету.
Але ёсць і добрыя навіны
Актор Бэн Афлек выставіў на продаж велізарны асабняк, у якім жыў пасля разводу з былой жонкай, піша часопіс "Правила жизни". Плошча асабняка — больш за гектар. Там ёсць басейн, спа, сем спальняў, дзевяць ванных пакояў. А шчасця, відаць, не было.
А з Джэніфер Лопес рай і ў будане, вырашыў актор. Пара ўз'ядналася праз 17 гадоў пасля расставання: Лопес і Афлек збіраліся пажаніцца яшчэ ў 2002 годзе. І нядаўна зрабілі гэта, хоць і на 15 гадоў пазней, чым планавалі.
![Их нравы: Дисней против Нетфликса, дерзкий чат-бот и счастливый Бен Аффлек](/sites/default/files/styles/default_image_paragraph_watermark/public/paragraphs/image/ben-affleck-jlo-23480aaa78f84de78e1481d74f33b17e.jpg.webp?itok=XYJ_ApEa)
Цяпер пара зняла асабняк у аўстралійскага мільярдэра, а нешчаслівы асабняк Афлека з сямю спальнямі і спа пайшоў у рукі рыэлтараў. Вам здаецца, што гэта проста свецкая навіна? А нам здаецца, што гэтая гісторыя пра каханне, якая спадабалася б нават "Дыснею". Дарэчы, пра "Дысней"!
Бітва стрымінгаў
"Нэтфлікс" губляе падпісчыкаў — куды ідуць усе гэтыя людзі? Мяркуючы па ўсім, яны падпісаліся менавіта на "Дысней". Гэта не рэклама, а разгар схваткі двух стрымінгавых гігантаў, расказвае ВВС.
Цяпер "Дысней" мае тры стрымінгавыя платформы, і ў пачатку ліпеня ў іх было больш за 220 млн падпісчыкаў! У "Нэтфлікса" прыкладна столькі ж, але толькі "Нэтфлікс" губляе падпісчыкаў, а "Дысней", наадварот, заваёўвае новых.
Развіццю стрымінгавых сэрвісаў паспрыялі лакдаўны 2020 года. І цяпер мы знаходзімся ў гарачай фазе стрымінгавай бітвы.
Не ведаеце, на што падпісацца? Падпісвайцеся на soundcloud Еўрарадыё — мы будзем расказваць вам пра самыя важныя навіны Беларусі, а часам забаўляць пацешнымі навінамі з усяго свету.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.