Галоўчанка — Мішусціну: маюцца пытанні, па якіх пакуль не дасягнуты кансэнсус
Прэм'еры Беларусі і Расіі ў пятніцу абмеркавалі ў Мінску пакет прапаноў па паглыбленні інтэграцыі краін. Беларускі прэм'ер-міністр Раман Галоўчанка заявіў, што ён "у высокай ступені гатоўнасці". Паводле яго слоў, эксперты з Беларусі і Расіі выпрацавалі "прапановы па паглыбленні эканамічнай інтэграцыі".
"Гэты пакет фармальна мае высокую ступень гатоўнасці, — цытуе словы Галоўчанкі ўрадавая прэс-служба. — Але маюцца пытанні, па якіх пакуль не дасягнуты кансэнсус у сутнасным плане".
Што ж гэта за пытанні? Яны "маюць практычную значнасць для выраўноўвання ўмоў гаспадарання нашых эканамічных агентаў". Беларускі прэм'ер называе згаданыя пытанні "складанымі" і "адчувальнымі". "Не знайшоўшы развязак па іх, мы не зможам выбудаваць па-сапраўднаму саюзную эканоміку і рэальны інтэграцыйны праект", — дадаў ён.
16 красавіка Міхаіл Мішусцін сустрэўся ў Мінску з Аляксандрам Лукашэнкам. Апошні анансаваў сустрэчу з Уладзімірам Пуціным у Маскве, верагодна, 22 красавіка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.