ЕС дапамог вярнуцца дадому з беларуска-польскай мяжы пяці тысячам мігрантаў
Еўрасаюз дапамог вярнуцца з беларуска-польскай мяжы дадому пяці тысячам мігрантаў. Такую лічбу назвала камісар ЕС па ўнутраных справах Ілва Ёхансан, выступаючы перад камітэтам Еўрапарламента, перадае DW.
За 2021 год на тэрыторыю Польшчы, Літвы і Латвіі трапілі восем тысяч чалавек, якія прасілі статус бежанца. Міграцыйны крызіс пачаўся ўвесну і працягваўся да канца года.
Сёння колькасць спробаў нелегальнага пераходу мяжы значна зменшылася, але такія спробы не спыніліся.
Ёхансан падкрэсліла, што выдварэнне мігрантаў з тэрыторыі краіны недапушчальна, і гэта павінна быць замацавана на заканадаўчым узроўні ў Польшчы, Літве ды Латвіі.
