Дзе патусіць на выхадных 17-19 студзеня, раіць Андрэй Хадановіч

Андрэй Хадановіч адзін-два разы на тыдзень ладзіць “культурацэнтрычныя выхады з дому”. Там — вершы пачытае, там — паспявае, а дзесьці і паслухае, як спяваюць-чытаюць. Але ніякім чынам такія выхады не тычацца танцаў у начных клубах. Андрэй не лічыць сябе тусоўшчыкам, але абавязкі арганізатара розных мерапрыемстваў ды літаратара часам прымушаюць прымерыць гэтую ролю.

Выхадныя 17-19 студзеня не вельмі багатыя на цікавыя для Андрэя Хадановіча імпрэзы. Напрыклад, суботу-нядзелю паэт прапануе правесці з сям’ёй. Калі ўсё ж жаданне куды-небудзь выбрацца пераможа, то раіць схадзіць у кіно. Напрыклад, на “Хобіт. Пустэча Смаўга” — дзецям дакладна спадабаецца. А вось асноўны падбор мерапрыемстваў прыпадае на пятніцу. Толькі трапіць на іх усе здолеюць хіба толькі людзі з паранармальнымі магчымасцямі.

“Самая інтэлігентная, рафінаваная частка мяне пайшла б у Купалаўскі тэатр на трэці прэм’ерны дзень спектакля “Пан Тадэвуш” паводле славутай паэмы Адама Міцкевіча. П’еса, якую ўсе чакалі і абмяркоўвалі яшчэ да паказаў. І першыя паказы ўжо выклікалі буру самых розных пачуццяў”.

На думку Андрэя Хадановіча, гэты твор вельмі важны для беларусаў і беларускай ідэнтычнасці. Напрыклад, рэжысёр пастаноўкі Мікалай Пінігін параўноўвае значнасць паэмы Міцкевіча для беларускай ментальнасці з “Яўгенам Анегіным” для расіян. На думку Хадановіча, наведванне пастаноўкі — выдатны варыянт зрабіць уласныя высновы на гэты конт. “Тым больш, у “Пане Тадэвушы” задзейнічаны культавы склад акцёраў на чале з Паўлам Харланчуком і Раманам Падалякам”, — адзначае літаратар.

Калі ж раптам не атрымаецца трапіць на прэм’ерны паказ, Андрэй Хадановіч прапануе схадзіць на іншую пастаноўку паводле Адама Міцкевіча, але ўжо ў панядзелак. У палацы прафсаюзаў “Тэатр Ч” будзе ставіць “Дзядоў”, таксама з выбітным наборам акцёраў.

“Другую частку кланаванага мяне, якая больш любіць слухаць музыку, падпяваць і танчыць у гарачым рытме харызматычных музыкаў, я б паспрабаваў бы намовіць убіцца ў клуб “Графіці”. Там будзе канцэрт, на мой погляд, аднаго з галоўных нашых музычных харызматыкаў, гурта “Рэха” з Андрусём Такіндангам і Раманам Абрамчуком. Акурат у нас зрабілася халодна, зімова, а там будзе вельмі горача ды прыемна”.

Ну і, каб канчаткова разгубіцца ў планах на пятніцу 17 студзеня, Андрэй Хадановіч прапануе наведаць яшчэ адно мерапрыемства. Сваю трэцюю, самую літаратурную частку паэт адправіў бы ў кнігарню “ЛогвінаЎ” на сяброўскі прагляд англійскага серыяла “Black Book”.

“Ён будзе паказаны ў беларускім перакладзе ў стылі блізкім да “гоблінскага”. Англійскія рэаліі перакладзеныя на беларускія. Лонданская кнігарня “Black Book” непазбежна пераўтвараецца ў “ЛогвінаЎ”. Галоўныя персанажы Ігар, Кася і Паўло шмат чаго гавораць сэрцам тых, хто ходзіць у “Галерэю Ў” і ў кнігарню “ЛогвінаЎ” на канцэрты і літаратурныя чытанні. Усё пазнавальна, усё весела... а самае прыкольнае, што замежны гумар вельмі лёгка канвертуецца ў наш”.

Усе пятнічныя мерапрыемствы, якія агучыў Андрэй Хадановіч пачынаюцца ў 19:00, таму выбар няпросты. Тым не менш, прыемных вам выходных!