Дэпутаты РФ і РБ шукаюць спосабы вярнуць грамадзян, якія з'ехалі
![У аэрапорце, ілюстрацыйнае фота](/sites/default/files/styles/gallery_main/public/2023-10/travel-9_10.jpg.webp?itok=lqlaztGT)
У аэрапорце, ілюстрацыйнае фота / pixabay.com
Дэпутаты Беларусі і Расіі рыхтуюць слуханні, прысвечаныя беларускай і расійскай дыяспарам за мяжой. Плануюць абмяркоўваць сярод іншага і захады, якія прымусілі б суайчыннікаў вярнуцца. Пра гэта расказвае расійская "Независимая газета". Гаворка, у прыватнасці, ідзе аб забеспячэнні пры вяртанні дадатковых ільгот. Аб'ём патэнцыйнай рэпатрыяцыі аўтары ідэі ацэньваюць у 3 млн чалавек для Беларусі і 30 млн для Расіі.
Слуханні "Становішча суайчыннікаў за мяжой: удасканаленне механізмаў абароны правоў і законных інтарэсаў" пройдуць 12 кастрычніка ў Калінінградзе ў рамках чарговага пасяджэння парламенцкага сходу Саюза Беларусі і Расіі. Аўтары канцэпцыі слуханняў мяркуюць, што гэтыя мільёны беларусаў і расіян, якія пражываюць за мяжой, "імкнуцца захаваць і пашырыць свае сувязі з гістарычнай радзімай". Больш за тое, у іх праз вайну, якую распачала Расія і падтрымала Беларусь, узніклі праблемы — яны сутыкнуліся з ціскам з боку мясцовай улады і СМІ, які расце. І гэтая відавочная дыскрымінацыя набыла "сістэмны і ўсёабдымны характар". Таму тых, хто з'ехаў, гатовыя прыняць назад — асабліва з улікам цяжкай дэмаграфічнай сітуацыя і ў Беларусі, і ў Расіі.
З тымі ж, хто не захоча вяртацца, дэпутаты-саюзнікі прапануюць больш актыўна працаваць — выбудоўваць "станоўчы вобраз РБ і РФ". Акрамя таго, абмяркоўваецца ідэя даць замежным прадстаўнікам "рускага свету" афіцыйнае падвойнае грамадзянства. Праўда, з артыкула незразумела, закране гэтая мера Беларусі ці толькі Расію.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.