Ціханоўская пракаментавала затрыманні і суды за данаты ў Беларусі
Акцыя салідарнасці ў Мінску, 2020 год / Euroradio
Кіраўніца Аб'яднанага Пераходнага Кабінета Беларусі Святлана Ціханоўская пракаментавала затрыманні і суды за данаты ў Беларусі. Яна запісала кароткі відэазварот да беларусаў, якія дапамагаюць адзін аднаму, нягледзячы на хвалю рэпрэсій, што праводзіць рэжым Аляксандра Лукашэнкі.
"Яшчэ ўчора вы везлі лекарам маскі з пальчаткамі і адкопвалі вуліцы пасля Хаўера — і былі героямі, — кажа Ціханоўская. — А сёння вы ўжо "экстрэмісты". І ўсё роўна, што ваш данат дапамог бабулі, хвораму на анкалогію ці дзецям палітвязняў".
Святлана Ціханоўская спадзяецца, што рэпрэсіі не спыняць салідарнасць, дапамогу адзін аднаму.
"Я ўпэўнена: вы працягнеце дапамагаць, — кажа кіраўніца Кабінета. — Але вельмі прашу: робячы дабро, беражыце сябе. Паклапаціцеся пра бяспеку, выконвайце меры засцярогі. І памятайце: няма такога закона, які б зрабіў беларусаў абыякавымі!"
У Беларусі працягваюцца суды за данаты. Нядаўна палітвязню Андрэю Савінскаму прысудзілі 5 гадоў пазбаўлення волі за ахвяраванне ў памеры $50. Таксама ад людзей, якіх сілавікі злавілі на данатах "экстрэмістам", патрабуюць заплаціць "адкупныя". Праўда, гэта не заўсёды выратоўвае ад крымінальнай справы.
