Ці сапраўды Беларусь сусветны лідар па спаме?

Даследаванне фірмы AppRiver, якое апублікавалі многія беларускія СМІ, кажа пра тое, што наша краіна стала сусветным лідэрам спаме. Ці так гэта, высвятляе Еўрарадыё.

 

Па дадзеных даследавання, у студзені 2013 года з Беларусі было 3,1 мільёна спам-паведамленняў за дзень. Пачынаючы з красавіка гэтая лічба расце і ўжо павялічылася да 12,3 мільёнаў. Кампанія сцвярджае, што 16,3% сусветнага спаму з — Беларусі і толькі 15,1% — з ЗША.

 

 

Звяртаемся да справаздачы “Лабараторыі Касперскага” за красавік 2013 года. Тут Беларусь не на першым месцы, а апошняя ў першай дзесятцы. Гэта па выніках красавіка.

 

У лідарах — Кітай, затым ЗША — 16,8%, Украіна на 6 месцы — 3,8%, Расія на 7 — 3,3%. На Беларусь прыпадае толькі — 2,5% сусветнага спаму.

 

 

Сярод рэгіёнаў лідарам па распаўсюджванні спаму застаецца Азія (55,7%). У красавіку ў першую тройку, як і ў папярэднім месяцы, увайшлі Паўночная Амерыка (17,6%) і Усходняя Еўропа (13,6%).

 

Працэнт Беларусі ўсё ж высокі, калі браць пад увагу колькасць карыстальнікаў інтэрнэту, якіх у ЗША і Кітаі значна больш. З чым жа можа быць звязана вялікая колькасць спаму?

 

"Калі гэты спам адпраўляюць з камп’ютараў прыватных асоб або кампаній, гэта магло б сведчыць пра тое, што людзі не дастатковую ўвагу надаюць антывірусным рашэнням. Гэта можна у прынцыпе разглядаць як камп’ютарную гігіену", — мяркуе кіраўнік праекта e-belarus.org Міхаіл Дарашэвіч.

 

Некаторыя спам-паведамленні ўтрымліваюць траяны, якія ў выніку самі рассылаюць спам ўжо з заражанага камп'ютара.

 

"Справа не ў карыстальніках інтэрнэту, а ў колькасці спецыялістаў. Ёсць шмат спецыялістаў, якія на гэтым зарабляюць. Адным з самых буйных сусветных спамераў быў украінец. У нашым рэгіёне, у шырокім сэнсе, заўсёды было ўсё нармальна і з тэхналогіямі, і са спамерамі, — кажа стваральнік "Акавіты" Фёдар Караленка. — Раней у Белтэлекама была такая паслуга, як беспарольны доступ у інтэрнэт па дыял-апе. Можна было лавінна спаміць датэлефаноўваючыся з белтэлекамаўскіх айпішнікаў колькі заўгодна. Потым гэта дасягнула такіх маштабаў, што пачаліся скаргі на ўзроўні аператараў сувязі. І Белтэлекам перакрыў порт 20 для адпраўлення пошты. Гэта старая гісторыя з пачатку 2000 гадоў".

 

 

З усёй колькасці спам-паведамленняў за красавік 2013 шкодныя ўкладанні ўтрымліваюць толькі 2,4% паведамленняў.

 

На першым месцы застаецца Trojan-Spy.HTML.Fraud.gen. Гэта старонка імітуе сэрвіс інтэрнэт-банкінгу. Просіць ўвесці асабістыя дадзеныя.

 

На другім месцы “чарвяк”, які адсылае свае копіі кантактам і можа ўсталёўваць на камп’ютар іншыя вірусы.

 

А на трэцім той самы “траян”, які можа незаўважна кіраваць камп’ютарам і рассылаць з яго спам. Тады заражаны комп сам становіцца часткай бот-нэту.

 

Далей ідуць “траяны”, якія крадуць паролі да акаўнтаў, ftp, пошты. Яны збіраюць захаваныя паролі ў браўзерах.