Брат і сябар загінулага ў калоніі Вітольда Ашурка з'ехалі з Беларусі

16/12/2021 - 17:45

Пад пагрозай крымінальнага пераследу з Беларусі тэрмінова з'ехалі актывісты з Бярозаўкі Андрэй Ашурак і Сяргей Пантус. Гэта брат загінулага ў шклоўскай калоніі Вітольда Ашурка і ягоны сябар

"Нам паступіла інфармацыя, што няе важна якім чынам, не важна за што, але мы павінныя сесці надоўга", — расказаў Сяргей Пантус у каментары Радыё "Свабода".

Напярэдадні стала вядома, што пракуратура пачала крымінальную справу за тое, што людзі крычалі "Ганьба" ў судзе пасля прысуду, вынесенага Вітольду Ашурку. Да жыхароў Лідчыны сталі прыходзіць сілавікі з ператрусамі. Людзі, якія раней былі сведкамі па справе, перайшлі ў статус падазраваных.

Брат Вітольда Андрэй Ашурак быў па гэтай справе сведкам. Да яго дадому таксама напярэдадні прыходзіла міліцыя.

Вітольд Ашурак, асуджаны на 5 гадоў, памёр у шклоўскай калоніі пры нявысветленых абставінах у траўні 2021-га.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.