Беларускія музыкі падтрымаюць акцыю "Гадзіна зямлі"

29 сакавіка беларускі гурт Shuma запрашае ў кавярню "Хуліган" на акустычны канцэрт пры свечках. Такім чынам каманда на чале з Русяй падтрымае сусветную акцыю "Гадзіна зямлі" згодна з якой цягам гадзіны з 20:30 па беларускім часе можна пагрузіцца ў цемру, выключыўшы электрычнасць у кватэрах і на вуліцах. Мэта акцыі — звярнуць увагу на праблемы экалогіі і глабальнага пацяплення.  

Да акцыі Shuma рыхтуе 25-хвілінны сэт, складзены з рытуальных народных спеваў.

Далучыцца да акцыі збіраецца таксама і гурт Re1ikt.

"Мы жывем і лічым, што жыццё ніколі не зменіцца, яно будзе такое як заўсёды ёсць. Але ўсё ж можа наступіць гадзіна "Х". Таму, каб яна не наступіла, давайце падтрымаем акцыю "Гадзіна Зямлі" і 29 сакавіка з 20.30 да 21.30 проста выключым усю электрычнасць у нашых кватэрах", — кажуць хлопцы.

У Мінску і іншых гарадах у гэты час знікне падсветка будынкаў, пройдуць вулічныя акцыі для прыцягнення ўвагі да праблем змен клімату/ Пра гэта паведамляе greenbelarus.info.