Беларусь не прызнае запазычанасць перад Расіяй за пастаўлены газ
![Беларусь не прызнае запазычанасць перад Расіяй за пастаўлены газ](/sites/default/files/styles/gallery_main/public/2023-08/patupczyk-1205.jpg.webp?itok=AZsAG3q_)
Беларусь не прызнае, што яна мае запазычанасць перад Расійскай Федэрацыяй за пастаўлены прыродны газ. Пра гэта журналістам 12 траўня заявіў кіраўнік Міністэрства энергетыкі Уладзімір Патупчык. Заява прагучала ў Магілёве перад пачаткам пасяджэння Савета міністраў Саюзнай дзяржавы Беларусі і Расіі.
"Беларусь плаціць у адпаведнасці з міжурадавай дамовай. Вось у судзе будзем і разбірацца з гэтым пытаннем", — перадае interfax.by словы Патупчыка.
Па словах міністра, расійскі і беларускі бакі па-рознаму трактуюць міжурадавую дамову наконт газу. Расійскі бок лічыць, што ёсць кошт "Ямала", а беларускі настойвае, што з 1 студзеня павінны дзейнічаць рынкавыя роўнадаходныя кошты.
У сваю чаргу кіраўнік расійскага Мінэнерга Аляксандр Новак заявіў журналістам, што Беларусь мае запазычанасць перад "Газпрамам" за чатыры месяцы — 125 млн долараў. Па словах расійскага чыноўніка, гэтая недаплата працягвае расці.