Беларусь наведае кіраўнік Індыі

Прэзідэнт Індыі Пранаб Мукерджы ў чэрвені плануе прыехаць у Мінск з афіцыйным візітам, паведамляе БЕЛТА са спасылкай на індыйскае дыппрадстаўніцтва ў Беларусі. Дакладныя мэты візіту невядомыя, але мяркуецца, што індыйскі кіраўнік будзе абмяркоўваць з беларускімі ўладамі пашырэнне эканамічных кантактаў.

На сёння таваразварот паміж Беларуссю і Індыяй складае каля паўмільярда долараў. Індыйскі бізнес рэалізаваў у нашай краіне шэраг паспяховых камерцыйных праектаў, напрыклад, паўдзельнічаў у рэканструкцыі Гродзенскай ЦЭЦ-2, якая была ўведзеная летам 2013 года. Беларусь у сваю чаргу з’яўляецца буйным пастаўшчыком калійных угнаенняў у Індыю.

У красавіку сёлета Індыю з афіцыйным візітам наведаў міністр замежных спраў Беларусі Уладзімір Макей. Ён правёў перамовы з кіраўніцтвам буйных кампаній, зацікаўленых у развіцці супрацоўніцтва з Беларуссю.

Фота: AFP