Бабруйскага Леніна адправілі ў санаторый (фота)
Правадыр сусветнага пралетарыяту цяпер будзе ўказваць шлях у светлую будучыню гасцям аздараўленчай установы.
У Бабруйску дэмантавалі помнік Леніну, які болей за паўстагоддзя прастаяў ля цэнтральнай прахадной мясцовага машынабудаўнічага заводу. 19 сакавіка помнік знялі з пастамента і перавезлі ў бабруйскі санаторый імя Леніна.
Рашэнне пра дэмантаж манумента правадыру прыняў Бабруйскі гарвыканкам — ля прахадной завода хочуць памяняць ландшафт тэрыторыі, а помнік перашкаджае гэтаму.
Помнік Леніну паставілі ля Бабруйскага машынабудаўнічага завода, бо прадпрыемства тады насіла імя правадыра. Цяпер манумент будзе “адпачываць” у санаторыі — таксама імя Леніна, піша komkur.info.
