Астравецкая бібліятэка не атрымае імя Адама Мальдзіса — пакуль што

Гродзенскі аблвыканкам прыпыніў рашэнне аб наданні Астравецкай раённай бібліятэцы імя Адама Мальдзіса. Рашэнне было прынятае Галоўным упраўленнем ідэалагічнай работы і па справах моладзі Гродзенскага аблвыканкама пасля звароту праўладнай актывісткі Вольгі Бондаравай.

Афіцыйны адказ за подпісам начальніка Галоўнага ўпраўлення Ігара Булаўкі Бондарава апублікавала ў сваім ТГ-канале.

Адам Мальдзіс — пісьменнік, літаратуразнаўца, гісторык. Вядомы як блізкі сябра Уладзіміра Караткевіча. Мальдзіс памёр 3 студзеня 2022 года ва ўзросце 89 гадоў.

У чэрвені 2022 года Беларускі фонд культуры прапанаваў Астравецкаму райвыканкаму ўвекавечыць памяць славутага земляка. 24 чэрвеня астравецкія чыноўнікі вырашылі надаць яго імя раённай бібліятэцы. 

Гэта выклікала абурэнне ў праўаднай актывісткі Вольгі Бондаравай. Яна напісала скаргу ў Гродзенскі аблвыканкам. Славутага навукоўца яна называла "махровым нацыяналістам" і "прапольскім дзеячам". У віну Мальдзісу яна ставіла нават атрыманы ім дзяржаўны ордэн Францішка Скарыны. 

Спярша гродзенскія чыноўнікі заявілі, што адмяняць рашэнне аб перайменаванні бібліятэкі не плануюць. Але цяпер прынялі іншае рашэнне.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.