Анэстэзіёлага "Экамедсэрвіса" асудзілі да 4 гадоў пазбаўлення волі
Адбываць іх Аляксандр Шураў будзе ва ўмовах калоніі-пасяленні. Такое рашэнне было абвешчана ў пятніцу ў судзе Кастрычніцкага раёна Мінска.
Як перадае interfax.by, Шурава прызналі вінаватым у неналежным выкананні службовых абавязкаў, якія прывялі па неасцярожнасці да смерці пацыента. Таксама суд забараніў Шураву на працягу пяці гадоў займацца медычнай дзейнасцю. Дарэчы, у суд лекар прыйшоў каротка стрыжаным і з вялікай сумкай.
Галоўны інжынер медцэнтра "Экамедсэрвіс" Вадзім Ліхута асуджаны на 3 гады пазбаўлення волі ў калоніі-пасяленні. Яму забаронена займацца пэўнымі відамі дзейнасці на працягу пяці гадоў.
Былая гендырэктарка медцэнтра Галіна Валжанкіна асуджаная на 2 гады абмежавання волі без накіравання ў папраўчыя ўстановы закрытага тыпу. Ёй таксама забаронена займацца медычнай дзейнасцю на 5 гадоў.
Усе трое ўзятыя пад падпіску аб нявыездзе.
Суд таксама пастанавіў спагнаць з "Экамедсэрвіса" па 500 мільёнаў рублёў на карысць кожнага з бацькоў загінулай пацыенткі Юліі Кубаравай. Грошы медцэнтр павінен выплаціць на працягу месяца.
Гэты прысуд можа быць абскарджаны ў судзе вышэйшай інстанцыі на працягу 10 сутак.
Нагадаем, што 25-гадовая гродзенка Юлія Кубарава памерла летась пасля аперацыі па карэкцыі носа, якую ёй зрабілі ў "Экамедсэрвісе".
Фота — onliner.by
