13 беларускіх спартсменаў паведамілі міліцыі пра дамоўныя матчы

Затрыманні арганізатараў дамоўных матчаў прайшлі ў пачатку студзеня (гл. відэа). Па звестках міліцыі, гэтыя людзі незаконны прыбытак атрымлівалі з букмекерскіх кантор краін заходняй Еўропы і Азіі. За кратамі знаходзіліся трое чалавек. Крымінальныя справы распачалі па артыкулах "махлярства" і "подкуп удзельнікаў і арганізатараў прафесійных спартыўных спаборніцтваў і відовішчных камерцыйных конкурсаў". Высвятляліся асобы ўсіх удзельнікаў злачынных схемаў. У студзені МУС прапанавала ім самім звяртацца да правахоўнікаў. І, як бачым, некаторыя адгукнуліся — ім паабяцалі вызваленне ад крымінальнай адказнасці, альбо яе змякчэнне.

Міліцыя інфармуе, што дамоўныя матчы былі выяўленыя ў розных відах спорту (найперш у футболе і валейболе). Яны адбыліся ў чэмпіянаце і кубку Беларусі ў 2017-2018 гадах.

Па "сігналах" ад 13 спартсменаў былі распачатыя чатыры крымінальныя справы "за подкуп удзельнікаў прафесійных спаборніцтваў". Былі задакументаваныя яшчэ больш за дзясятак такіх жа злачынных эпізодаў, матэрыялы па якіх накіравалі ў Следчы камітэт.

Папярэдні раз пра выкрыццё злачыннай схемы дамоўных матчаў МУС Беларусі заявіла ў ліпені 2016 года. У кастрычніку 2017-га былі асуджаныя 15 чалавек. Яны атрымалі альбо абмежаванне волі, альбо штрафы. Летась Беларуская федэрацыя футбола іх пажыццёва дыскваліфікавала.