Жыхарка гомельскай вёскі прыгразіла аблвыканкаму пікетам
Любоў Ермалаева / кадр з TikTok Любові Ермалаевай
Жыхарка вёскі Іванькаў на Гомельшчыне, ветэран працы Любоў Ермалаева ў TikTok прыгразіла аблвыканкаму пікетам. Усё праз смярдзючую ваду — у ёй павышаны ўзровень нітратаў, піша "Флагшток".
Жанчына звярталася ў аблвыканкам, да памочніка Лукашэнкі і да Наталлі Качанавай, але гэтыя звароты ніякага выніку не далі. На адзін з іх прыйшоў даволі здзеклівы адказ ад чыноўнікаў.
"Гомельскі аблвыканкам, разгледзеўшы ваш зварот, інфармуе, што ў аўтакраме да рэалізацыі прапануецца бутыляваная вада", — цытуе ліст пенсіянерка.
Жанчына заяўляе, што ў 2020 годзе галасавала за Лукашэнку. Яна звяртаецца да яго са словамі, што мясцовыя ўлады "перайшлі чырвоную лінію".
Напярэдадні "выбараў" звароты да ўладаў — адзін з дзейсных спосабаў вырашыць застарэлую праблему. Гэтым скарысталіся, напрыклад, работнікі мінскага рыбакансервавага камбіната "Сталічны", якім некалькі месяцаў затрымліваюць заробкі.
