Вы тут

Зборная Беларусі U-19 даведалася сапернікаў у кваліфікацыі юнацкіх ЧЕ

Фота выкарыстоўваецца ў якасці ілюстрацыі / адкрытыя крыніцы

Лёсаванне кваліфікацыйных раўндаў чэмпіянату Еўропы сярод юніёраў да 19 гадоў сезонаў 2020—2021, а таксама 2021—2022 прайшло ў штаб-кватэры УЕФА ў Ньёне. У групе 2-га кваліфікацыйнага раўнда юніёрскага чэмпіянату Еўропы 2020—2022 гг. згуляе зборная Беларусі U19, у якую ўваходзяць спартоўцы, не старэйшыя за 2002 год нараджэння. Як паведамляе "Прессбол", сапернікамі "белакрылых" стануць аднагодкі з Чарнагорыі, Ізраіля і Украіны. 10, 13 і 16 лістапада 2020 года ў Ізраілі адбудуцца матчы міні-турніру. Па дзве найлепшыя каманды з кожнага квартэта і яшчэ найлепшая дружына з тых, хто зойме трэція месцы, пройдуць у элітны раўнд. Спаборніцтвы запланаваныя на сакавік 2021 года. У фінале юніёрскага чэмпіянату Еўропы УЕФА — 2021 у Румыніі выступяць 8 зборных.

Акрамя таго, 3 снежня прайшло лёсаванне першага раўнда новага чэмпіянату Еўропы УЕФА сярод юніёраў да 19 гадоў, які адбудзецца ў стылі Лігі Нацый УЕФА. Цяперашнюю аднасезонную кваліфікацыйную сістэму зменіць новы 2-гадовы фармат. Ён прадугледжвае чатыры раўнды міні-турніраў, у тым ліку павышэнне і паніжэнне да фінальнага турніру, які адбудзецца ў Славакіі ў 2022 годзе.

Еўрапейскія юніёрскія зборныя былі падзеленыя на тры лігі: A, B і С.

Беларуская зборная U19, у якую ўвойдуць спартсмены, не старэйшыя за 2003 год нараджэння, згуляе ў групе С2 першага раўнда юніёрскага чэмпіянату Еўропы УЕФА 2020—2022. Сапернікамі "белакрылых" стануць равеснікі з Паўночнай Ірландыі, Гібралтара, а таксама Сан-Марына. Спаборніцтвы міні-турніру адбудуцца ў Беларусі 2, 5 і 8 верасня 2020 года. Лідары кожнага квартэта лігі C, а таксама найлепшыя дружыны з тых, хто зойме другія месцы, адправяцца ў лігу B. Па такой сістэме з верасня 2020 года па сакавік 2022-га пройдуць чатыры раўнды кваліфікацыі. Фінальны турнір адбудзецца ў Славакіі ў ліпені 2022 года.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.