Забойцу мінчанкі Таццяны Курсевіч прысудзілі да 18 гадоў пазбаўлення волі
Судовая калегія па крымінальных справах Мінскага гарадскога суда вынесла прысуд па крымінальнай справе 32-гадовага мінчука Яўгена Раздуева. Яго вінавацілі ў жорсткім забойстве 32-гадовай Таццяны Курсевіч. Як перадае БЕЛТА, мужчыну прызналі вінаватым у шэрагу злачынстваў — забойстве, учыненым з асаблівай жорсткасцю, таемным крадзяжы маёмасці, крадзяжы асабістых дакументаў.
Раздуева асудзілі на 18 гадоў калоніі ўзмоцненага рэжыму. Акрамя таго, суд пастанавіў спагнаць з Раздуева кампенсацыю маральнай шкоды на карысць блізкіх забітай у памеры 140 тысяч рублёў.
Падчас папярэдняга следства на аўтамабіль Раздуева і лецішча ў Вілейскім раёне быў накладзены арышт. Гэтая маёмасць можа выкарыстоўвацца для выплаты сумы маральнай шкоды.
Прысуд не набыў законную моц і можа быць абскарджаны і апратэставаны ў адпаведным парадку.
Як паведамлялася раней, трагедыя адбылася 15 лістапада 2016 года. Падчас сваркі мужчына біў Таццяну Курсевіч нагамі і рукамі, а потым узяў сякеру і тупой паверхняй некалькі разоў стукнуў па галаве. У час забойства сын забітай знаходзіўся дома і нічога не чуў.
Зламыснік схаваў труп у багажнік аўто. Зранку ён адвёз хлопчыка ў школу, а потым на машыне з трупам паехаў у бок Маладзечна. Цела ён закапаў каля свайго вясковага дома ў Вілейскім раёне.
Пазней ён заявіў міліцыянтам, што злачынства ўчыніў па неасцярожнасці. Па словах Раздуева, ён ненаўмысна штурхнуў жанчыну, яна павалілся, стукнуўшыся галавой аб кут ложка, і засталася без прытомнасці. Ён, маўляў, закруціў труп у прасціну і капу, паклаў у багажнік і на наступны дзень закапаў.
Таццяна Курсевіч з сярэдзіны лістапада не выходзіла на сувязь з сваякамі і сябрамі. Заяву пра яе знікненне напісаў былы муж. Жанчыну шукалі міліцыя і валанцёры.
