За падпіскі на "экстрэмістаў" выхавацельніцу аштрафавалі на 555 рублёў
Наталля Сідлярэвіч / Аднакласнікі
У Беларусі за падпіскі на "экстрэмісцкія" інфарэсурсы пакаралі выхавацельніцу карэкцыйна-развіваючага цэнтра, піша "Віцебская вясна". Суд адбыўся 28 лістапада, але праваабаронцы даведаліся пра яго толькі цяпер.
Суддзя Пастаўскага раёна Наталля Максімовіч аштрафавала на 555 рублёў і канфіскавала ў даход дзяржавы тэлефон у Наталлі Сідлярэвіч.
У пратаколе з міліцыі было напісана, што са жніўня 2020-га ў сацыяльнай сетцы "Аднакласнікі" выхавацельніца была падпісаная на акаўнты "Белсат", TUT.BY, "МАЯ КРАІНА ВОЛЬНАЯ ВЯЛІКАЯ ЕЎРАПЕЙСКАЯ БЕЛАРУСЬ!", а таксама на тэлеграм-канал SYMBAL.BY.
На судзе Сідлярэвіч прызнала сваю віну і раскаялася. Таму ёй прысудзілі даволі мяккі штраф — 15 базавых велічыняў.
