За "абразу Лукашэнкі" ў калонію адправілі бацьку шасці дзяцей
![Дзмітрый Лазар / t.me/viasna96/](/sites/default/files/styles/gallery_main/public/2023-08/Lazar.jpg.webp?itok=wgnhREa2)
Дзмітрый Лазар / t.me/viasna96/
Суд Маладзечанскага раёна (суддзя — Дзяніс Барэйка) адправіў на два з паловай года ў калонію агульнага рэжыму бацьку шасці дзяцей Дзмітрыя Лазара. Ён быў прызнаны вінаватым у "абразе" суддзі, чатырох міліцыянераў і Аляксандра Лукашэнкі. Лазару прызначылі і штраф — 3700 рублёў. Дзяржабвінавачванне падтрымала памочніца пракурора Юлія Жук (яна прасіла 4 гады калоніі), паведамляе @viasna96.
Па версіі следства, Дзмітрый Лазар у тэлеграм-чаце пакінуў "абразлівыя каментары" ў дачыненні да мінскай пракуроркі Жаны Баранавай, суддзі суда Ленінскага раёна Гродна Мікалая Сяргейкі, міліцыянераў з Мінска, Гродна і Магілёва.
Лазару 38 гадоў. Ён мае вышэйшую адукацыю, працаваў кіроўцам у прыватнай фірме. З шасці дзяцей трое непаўнагадовыя (аднаму з іх два гады).
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.