Яшчэ адна лыжніца заявіла пра пераслед па палітычных матывах

Ад удзелу ў міжнародных спаборніцтвах беларускія ўлады адхілілі лыжніцу Святлану Андрыюк, перадае DW. 

Раней паведамлялася, што такое ж рашэнне было прынятае ў адносінах да Дар'і Далідовіч — дачкі вядомага лыжніка Сяргея Далідовіча.

Дар'я і Святлана кажуць, што ў мінулым месяцы Беларускі лыжны саюз дэактываваў іх індывідуальныя ідэнтыфікацыйныя нумары, неабходныя для ўдзелу ў спаборніцтвах. Гэта было зроблена нібыта па ўказанні кіраўніка Беларускай федэрацыі лыжных гонак Аляксандра Дараховіча, які загадаў забараніць для іх удзел у міжнародных спаборніцтвах і зборах краіны.

22-гадовая Андрыюк з гэтай прычыны была вымушаная прапусціць кваліфікацыйныя спаборніцтвы, на якіх магла атрымаць ліцэнзію на Алімпійскія гульні ў Пекіне. "Яны (спартовыя чыноўнікі) даслоўна абвінавацілі мяне ў тым, што я прыхільнік апазіцыі", — кажа спартоўка.

Цяпер дзяўчына вымушаная пакінуць Беларусь і плануе з'ехаць у Польшчу.