"Я стаў пакутаваць на бяссонніцу". Дэпутата назвалі злодзеем, а ён падаў у суд
![Дэпутат Юрый Стукаў адмаўляецца каментаваць сітуацыю журналістам](/sites/default/files/styles/gallery_main/public/2023-08/su1.jpg.webp?itok=nu1rc02C)
Дэпутат Юрый Стукаў адмаўляецца каментаваць сітуацыю журналістам
Выбары ў мясцовыя саветы прайшлі ў Беларусі 18 лютага, але ў пасёлку Хацежына пад Мінскам страсці бушуюць да гэтага часу. Дэпутат Мінскага райсавета Юрый Стукаў падаў у суд на сваю саперніцу па акрузе Вольгу Саўчыну. Падстава для іску — паклёп: ужо пасля выбараў Саўчына публічна назвала Стукава злодзеем і крымінальнікам.
Хацежынская выбарчая акруга № 22 была у Мінскім раёне адной з нешматлікіх альтэрнатыўных. Барацьба тут разгортвалася паміж дваімі кандыдатамі: старшынёй Хацежынскага сельскага выканкама Юрыем Стукавым і старшынёй спажывецкага кааператыва па газіфікацыі і добраўпарадкаванні "Палі Хацежына" Вольгай Саўчынай. Кандыдаты, хоць абодва і беспартыйныя, па сутнасці — вершы і проза, лёд і полымя. То бок поўныя супрацьлегласці. Стукаў — чалавек з мясцовай улады. Саўчына — мясцовая парушальніца спакою.
![“Я стал страдать бессонницей”. Минского депутата назвали вором, а он подал в суд](/sites/default/files/paragraphs/image/su2.jpg)
"Ёю былі выказаны фразы: "Стукаў Юрый Леанідавіч — злодзей і крымінальнік. Яго партрэт павінен вісець на сцяне, пад якім трэба напісаць пра гэта вялікімі літарамі. Колькі вы будзеце трываць? Звярніцеся ў міліцыю!" — успамінае дэпутат падчас першага пасяджэння ў судзе Мінскага раёна. Інцыдэнт адбыўся 29 сакавіка падчас прыёму грамадзян у Хацежынскім сельсавеце. Былая канкурэнтка бесстаронна адгукнулася пра дэпутата ў размове з мясцовымі жыхарамі, якія стаялі ў чарзе.
Стукаў звярнуўся ў міліцыю. Ён лічыць, што Саўчына на яго ўзводзіць паклёп. Аднак актывістка прыводзіць аргументы ў доказ сваёй невінаватасці.
"У 2015 годзе Стукаў прыцягваўся да крымінальнай адказнасці па частцы 1 артыкула 210 — па крадзяжы паліва, — расказвае Еўрарадыё Вольга Саўчына. — У сувязі з тым, што ён пагасіў шкоду і прызнаў сваю віну, яго не асудзілі. Дадзеная інфармацыя была схаваная ад выбаршчыкаў — напрыклад, яе не было на плакаце з інфармацыяй пра кандыдата ў дэпутаты Стукава. Лічу сваім абавязкам як грамадзяніна паведаміць, што сённяшні дэпутат і старшыня выканкама здзейсніў такую памылку".
![“Я стал страдать бессонницей”. Минского депутата назвали вором, а он подал в суд](/sites/default/files/paragraphs/image/su3.jpg)
Яшчэ падчас перадвыбарнай кампаніі Саўчына была на прыёме ў старшыні ЦВК Лідзіі Ярмошынай, а таксама тэлефанавала на прамую лінію міністру ўнутраных спраў Ігару Шуневічу. І там, і там ёй патлумачылі, што Юрый Стукаў, хутчэй за ўсё, памыліўся, але права на памылку мае кожны.
"Судзіць за такую памылку павінны грамадзяне, якія аддаюць галасы, а таксама чакаюць ад дэпутата абароны і выканання законаў", — перакананая Саўчына. Яна не разумее, чаму Стукаў не расказаў выбаршчыкам пра сваё "цёмнае мінулае", як гэта вымушаныя былі зрабіць некаторыя іншыя кандыдаты.
![“Я стал страдать бессонницей”. Минского депутата назвали вором, а он подал в суд](/sites/default/files/paragraphs/image/su4.jpg)
Для нас жа відавочна, што Юрый Стукаў скарыстаўся шчылінай у беларускім заканадаўстве. Так, супраць яго была распачатая крымінальная справа. Так, ён прызнаўся ў зробленым, кампенсаваў шкоду і быў вызвалены ад пераследу ў сувязі з дзейным раскаяннем. Але судзімасці, пра якую кандыдаты ў дэпутаты абавязаны паведамляць у сваіх перадвыбарчых улётках, у яго няма — бо справа не дайшла да суда.
Пытанне, якое цяпер вырашаецца ў судзе Мінскага раёна: улічваючы хоць і з усіх бакоў даказаную, але так і не даведзеную да суда справу, ці мае хто-небудзь права публічна назваць дэпутата злодзеем?
"З-за паклёпу Саўчынай В.В. я ўвесь час знаходжуся ў стане стрэсу і эмацыйнага напружання, — напісаў у іскавай заяве Юрый Стукаў. — Мне ўвесь час прыходзіцца апраўдвацца перад вышэйстаячым кіраўніцтвам, знаёмымі і іншымі людзьмі, што наносіць мне душэўную траўму, фізічныя і маральныя пакуты, у выніку чаго я стаў пакутаваць на бяссонніцу, што прыводзіць да нервовага зрыву і дэпрэсіі".
Першае пасяджэнне па справе "Стукаў супраць Сашчынай" прайшло 25 красавіка і доўжылася менш за гадзіну.
На пытанне адваката Саўчынай, ці здзяйсняў Стукаў калі-небудзь якія-небудзь крадзяжы, дэпутат адказвае ўнікліва: "Калі б былі факты крадзяжу, у мяне была б судзімасць. У мяне судзімасці няма".
![“Я стал страдать бессонницей”. Минского депутата назвали вором, а он подал в суд](/sites/default/files/paragraphs/image/su5.jpg)
Пасля гэтай заявы суддзя Аляксей Крапачоў удакладняе ў дэпутата, ці быў ён сведкам так званага паклёпу або даведаўся пра яго ад іншых асоб. Стукаў нагадвае, што ў той час разам са сваім намеснікам вёў прыём грамадзян. Суддзя пастанаўлівае адкласці слуханне справы да 7 траўня, каб выклікаць на пасяджэнне сведак.
Хадайніцтва адваката аб далучэнні да цяперашняй справы матэрыялаў крымінальнай вытворчасці супраць Стукава, якая вялася ў 2015-2016 гадах, засталося без разгляду.