"Я не буду называць лічбы, вы спалохаецеся". Перавозчыкі — пра чэргі на мяжы

26/12/2023 - 15:12

На мяжы з ЕС аўтобусы стаяць па 12 гадзін

На мяжы з ЕС аўтобусы стаяць па 12 гадзін / @rubanau_collage

Новы год і Каляды беларусы традыцыйна імкнуцца сустрэць са сваёй сям'ёй. Не выключэнне і беларусы, якія жывуць за мяжой.

Напярэдадні каталіцкіх Калядаў чэргі на межах Беларусі і краін Еўрасаюза выраслі ў разы. Аўтамабілісты вымушаныя прастойваць па 50 і нават па 60 гадзін. Аўтобусы маглі затрымацца аж на 12.

З чым звязаны такі ажыятаж? Ці зменіцца сітуацыя пасля святаў? І прычым тут КДБ? Еўрарадыё распытала аўтобусных перавозчыкаў і пачытала чаты.

“Запасайцеся ежай, вадой, цёплай вопраткай”

У беларускіх эмігранцкіх чатах цяпер самая актуальная тэма — мяжа. Хтосьці хоча паехаць у Беларусь, хтосьці едзе ў адваротны бок. Аднак велічэзныя чэргі ствараюць гэтаму мноства перашкод.

— Ну дык з палову краіны з'ехала. Бацькі едуць дзяцей адведаць. А памежных пераходаў ужо не столькі. Пройдуць святы, і стане прасцей, — піша ў чаце беларуска.

Многія адзначаюць, што затрымкі звязаныя не толькі з вялікім ажыятажам перад святамі, але і з допытамі, якія ладзіць беларускі КДБ.

— Ішлі праз Брэст на аўтобусе. Былі першыя, польскую прайшлі за 30 хвілін, на беларускай завіслі на 8 гадзін. Дапытвалі чатырох чалавек з Украіны. І перад імі доўга глядзелі аўтобус. Як пашанцуе, — паведамляе ў адным з чатаў мужчына, які нядаўна прыехаў у Беларусь.

Пры гэтым людзі пішуць, што грамадзян Украіны, якія едуць у Беларусь, могуць даглядаць тры і нават пяць гадзін.

— Доўга ці нядоўга, але аўтобус чакае ўсіх да апошняга. І наогул, 12 гадзін на аўтобусе — гэта яшчэ не жэсць. На машыне людзі і па 64 гадзіны чакалі, — піша мужчына ў чаце.

У гэтых жа чатах беларусы ўжо жартуюць — маўляў, "дзівімся, што птушак не даглядаюць".

Дарэчы, нават у гэтай сітуацыі зноў праявілася салідарнасць беларусаў. Мы сустракалі такія паведамленні:

— Стаяць і па 15 гадзін у чарзе. Запасайцеся ежай, вадой, цёплай вопраткай, пледам. У аўтобусах холадна, эканомяць паліва. Прыбіральні ў аўтобусах могуць быць зачыненыя, бо перапоўненыя. Людзі ходзяць проста на ўзбочыны дарог.

Да канца выходных, паводле адчуванняў, сітуацыя трохі нармалізавалася. Беларусы пісалі, што колькасць аўтобусаў знізілася, а агульны час праходжання мяжы складаў прыкладна 6-7 гадзін.

“Я нават не буду агучваць вам лічбы, вы толькі спалохаецеся”

Аднак тым, хто плануе перасякаць мяжу пад Новы год, ад гэтага, здаецца, не лягчэй. Журналіст Еўрарадыё пад выглядам грамадзяніна, які плануе навагодняе падарожжа ў Еўропу, патэлефанаваў беларускім кампаніям па перавозцы пасажыраў у краіны ЕС, дзе яму расказалі, што ажыятаж на мяжы будзе аж да праваслаўнага Раства.

— Напярэдадні Новага года, мы ж разумеем, вялікія чэргі. Амаль па 100 аўтобусаў. На польскай мяжы давядзецца вельмі доўга стаяць, я нават не буду агучваць вам лічбы, вы толькі спалохаецеся. А калі будуць, не дай бог, нейкія праблемныя пасажыры, то час яшчэ больш павялічыцца. На літоўскай мяжы абстаноўка крыху лепшая: праходжанне мяжы на выходных там складала максімум пяць гадзін.

Пры гэтым аператарка Ecolines расказала, што аўтобусы з Мінска ў любым выпадку будуць адпраўляцца па раскладзе, а ўжо назад, у залежнасці ад сітуацыі на мяжы, яны могуць ехаць з затрымкай. Дзяўчына запэўніла, што ўсім пасажырам пра гэта загадзя паведамляюць.

У кол-цэнтры Infobus папярэдзілі, што калі вы плануеце паездку ў Польшчу (і з Польшчы таксама), то трэба разлічваць на тое, што час праходжання мяжы складзе каля 10 гадзін.

— Напрыклад, на выходных максімальны прастой нашага аўтобуса склаў 12 гадзін. На літоўскіх пунктах пропуску бярыце ў разлік гадзін 9, цяпер стаяць усюды. Разумееце, праходжанне мяжы адносіцца да форс-мажорных абставін, прадбачыць тут немагчыма. Вы можаце як стаяць, так і не стаяць.

Супрацоўніца кампаніі Intercars таксама паведаміла, што прастаяць на польскай мяжы і туды, і назад давядзецца каля 12 гадзін. Пры гэтым запэўніла, што аўтобусы як з Мінска, так і з Варшавы адпраўляюцца практычна без спазненняў.

— Канкрэтна аўтобусы нашай кампаніі адпраўляюцца па раскладзе, у гэтым плане затрымак няма. Яны, вядома, бываюць, але гэта рэдкасць нават цяпер. На літоўскай мяжы нашы аўтобусы стаялі гадзін па шэсць. У абодва бакі.

Тое самае нам расказалі ў кампаніі Visit-tour: паводле аператара, спазненне складзе мінімум 12 гадзін.

— З Мінска некаторыя аўтобусы, вядома, могуць ісці са спазненнем, гэта наўпрост залежыць ад праходжання мяжы. Можа быць і пяць гадзін затрымка. Але мы стараемся, каб усе рэйсы ішлі па раскладзе. У звычайны час праходжанне мяжы адным аўтобусам роўнае прыкладна пяці гадзінам, з набліжэннем святаў гэтая лічба павялічылася спачатку да 8, потым да 12. Цяпер час зноў крыху знізіўся, — расказала прадстаўніца кампаніі.

Відавочна, што вялікія чэргі на межах справакаваныя жаданнем людзей пабачыцца з блізкімі на святы. Аднак не менш відавочнае тое, што павелічэнне часу прастою аўтобусаў і аўтамабіляў правакуюць супрацоўнікі КДБ, што па некалькі гадзін дапытваюць "падазроных" пасажыраў. Нярэдка такія допыты заканчваюцца затрыманнем.

Так, паводле інфармацыі праваабарончага цэнтра "Вясна", з пачатку 2023 года мінімум 125 чалавек затрымалі пасля вяртання ў Беларусь.