Выстаўленае абвінавачванне яшчэ 5 удзельнікам "масавых беспарадкаў"
У паведамленні ГУУС Мінгарвыканкама яны названыя "найбольш актыўнымі" ўдзельнікамі падзей на плошчы Незалежнасці 19 снежня 2010 года.
Следчае упраўленне папярэдняга расследавання ГУУС Мінгарвыканкама сёння прад'явіла абвінавачванні найбольш актыўным удзельнікам масавых беспарадкаў 19 снежня — Дразду Д., Лобану У., Сакрэту Я., Мацукевічу В., Казакову С. па ч.2 арт.293 КК РБ ("Масавыя беспарадкі").
Як паведамляе прэс-служба МУС, астатнім удзельнікам масавых беспарадкаў — Вінаградаву П., Хамічэнку У., Федаркевічу А. — абвінавачванне будзе выстаўленае 5 красавіка.
Пры гэтым МУС абвяргае дачыненне Федаркевіча і Хамічэнкі да праваахоўных структур.
"Паводле сцвярджэння некаторых сродкаў масавай інфармацыі, Федаркевіч А. і Хамічэнка У. з'яўляліся "правакатарамі і агентамі беларускіх праваахоўных структур". Падчас следства вызначаныя ўсе факты іх супрацьпраўнай дзейнасці і абвергнутая інфармацыя аб іх датычнасць да праваахоўных органаў", — адзначаецца ў паведамленні МУС.
