Выкладчыка ЕГУ, якога абвінавацілі ў харасменце, адхілілі ад працы
Сяргей Сялецкі / instagram.com
Выкладчыка Еўрапейскага гуманітарнага ўніверсітэта Сяргея Сялецкага, якога абвінавацілі ў харасменце, адхілілі ад працы. Пакуль на некалькі дзён (да 13 кастрычніка), але рашэнне могуць працягнуць, паведамляе прэс-служба ЕГУ.
Ва ўніверсітэце стварылі спецыяльную камісію, каб сабраць і прааналізаваць інфармацыю. На падставе яе высноў ЕГУ абяцае прымаць “далейшыя ўнутраныя працэдуры”. Таксама плануецца прыцягнуць незалежных экспертаў "у складзе асобнай камісіі, якая вывучыць абставіны, якія паслужылі падставай для публікацый, і прадставіць сваю справаздачу спецыяльнай камісіі ЕГУ".
Скандал выбухнуў у верасні. Пасля абвінавачванняў з боку студэнтак у Вільні ў культурнай прасторы CreateCulture адмянілі выставу выкладчыка і мастака Сялецкага. Ён заявіў, што ў шоку ад таго, што адбылося.
