Вельмі страшныя каты-бульдогі і жалеза ў страўніку — #ІхНоравы

22/08/2024 - 15:54

Замежныя навіны / @rubanau_collage

У В'етнаме адбыўся цуд: хлопчыка, які згубіўся ў лесе і не мог знайсці дарогу дадому, знайшлі праз пяць дзён пошукаў. Тым часам нарвежскія навукоўцы стварылі віртуальнага інструктара па кіраванню, які можа стаць сапраўдным выратаваннем для будучых студэнтаў. Гэты ШI-настаўнік ніколі не павысіць голасу і дапаможа вам папрактыкавацца ў розных дарожных сітуацыях.

У Іране адбыўся незвычайны інцыдэнт: мужчына праглынуў каля трох кілаграмаў металічных дэталяў, і гэта зусім не звязанае з недахопам жалеза ў яго арганізме.

Пра ўсё гэта, а таксама пра катоў-бульдогаў, супраць размнажэння якіх актыўна выступаюць зааабаронцы, чытайце ў нашым традыцыйным аглядзе замежных навін "Іх норавы".

Цуд у В'етнаме

У В'етнаме знайшлі хлопчыка, які правёў пяць дзён у лесе адзін. Паліцыя назвала яго выратаванне "цудам".

17 жніўня шасцігадовы Данг Ціен Лам гуляў каля ручая са сваімі братамі і сёстрамі. Потым ён згубіў іх з вачэй і забрыў у горы.

Мясцовыя ўлады арганізавалі выратавальніцка-пошукавую аперацыю, у якой удзельнічалі больш за 150 добраахвотнікаў, а таксама паліцэйскія і вайскоўцы. Праз пяць дзён дзіцяці адшукаў 52-гадовы фермер Лі Ван Нанг.

Мужчына займаўся працай у полі побач з лесам, калі пачуў плач хлопчыка.

— Я так стаміўся, я не магу падняцца, калі ласка, дапамажыце мне, — сказаў той, калі фермер прыйшоў на яго голас.

Як аказалася пазней, у лесе Лам еў лісце і дзікія фрукты, а ваду чэрпаў у рацэ. Гэта дапамагло хлопчыку выжыць.

Каты-мутанты

Зааабаронцы заклікалі байкатаваць пароду кошак "булі". Гэтыя хатнія жывёлы нагадваюць карлікавых сфінксаў з мноствам зморшчын на кароткіх крывых лапах. У іх адсутнічаюць вусы (вібрысы), вельмі важныя для звяроў.

Заолагі з розных краін б'юць трывогу. Яны лічаць, што гадаванцы пакутуюць ад генетычных мутацый.

Карлікавасць прыводзіць да боляў у суставах, а адсутнасць поўсці — да сонечных апёкаў. З-за складак і дробных зморшчын булі схільныя да інфекцый. Таксама яны схільныя да захворванняў скуры і нават раку.

Зааабаронцы лічаць, што развядзенне такой пароды з'яўляецца жорсткім абыходжаннем з жывёламі. А тыя, хто купляе булі, падтрымліваюць попыт і тым самым становяцца саўдзельнікамі гэтага акта жорсткасці.

Каты-бульдогі з'явіліся ў ЗША некалькі гадоў таму. На сёння найбольшай папулярнасцю парода карыстаецца ў Вялікабрытаніі.

Віртуальны інструктар па кіраванню аўтамабілем

Навукоўцы з Нарвежскага тэхнічнага універсітэта, супрацоўнікі IT-кампаніі Virtue і аўташколы WAY AS стварылі ШІ-інструктара па кіраванню аўтамабілем.

Галоўная мэта, якую паставілі даследчыкі, — высветліць, ці можна стварыць сістэму, здольную ацэньваць дарожныя сітуацыі не горш за жывога чалавека.

Для навучання ў поўнамаштабны аўтамабільны сімулятар загрузілі 477 дарожных сітуацый, сярод якіх абгоны, кругавыя развязкі, усялякія скрыжаванні і шмат што іншае. У выпрабаваннях удзельнічалі сем рэальных інструктараў па кіраванню і 21 студэнт.

Выніковая ацэнка не падвяла чаканняў навукоўцаў. Больш за тое, у віртуальнага настаўніка ёсць перавага — адсутнасць эмоцый і перадузятасці.

Укараненне тэхналогіі дапаможа знізіць кошт навучання і скараціць час трэніровак. Акрамя таго, студэнты змогуць максімальна адпрацаваць праблемныя моманты, бо сімулятар падбірае індывідуальныя сцэнары для кожнага.

"Жалезны" псіхоз

У Іране медыкі дасталі са страўніка мужчыны 452 дробныя металічныя прадметы. Агульная вага дэталяў — каля трох кілаграмаў.

37-гадовы пацыент паскардзіўся на млосць і болі ў жываце. Пры гэтым ён не мог ні есці, ні піць.

Калі лекары атрымалі рэнтгенаўскія здымкі, то ўбачылі вялікую колькасць металу ў страўніку мужчыны. Яны правялі экстранную аперацыю і вынялі з арганізма мноства гаек, балтоў, цвікоў і іншых прадметаў.

Пацыенту паставілі дыягназ — псіхоз. Ён можа прымаць форму галюцынацый, прыводзіць да вар'яцкага ўяўлення аб рэальнасці, а таксама зблытанага і вычварнага мыслення. На працягу трох месяцаў, падчас абвастрэння разладу, мужчына глытаў метал.

Пацыента адправілі на лячэнне ў псіхіятрычнае аддзяленне. Лекары высветлілі, што ён моцна залежыць ад апіятаў.