Вы тут

Ужо прыкідваў, колькі каштуе платнае, — але здаў ЦТ на сто балаў!

ЦТ / vgr.by

Цэнтралізаванае тэставанне 2020 года падыходзіць да канца. Па грамадазнаўстве, рускай і беларускай мовах і матэматыцы ўжо вядомыя вынікі. Нягледзячы на тое, што з мінулага года набраць максімальны бал стала нашмат цяжэй, чым раней, сярод абітурыентаў ёсць і стабальнікі!

Еўрарадыё распытала, як ім удалося дамагчыся максімальных балаў і што яны плануюць далей з гэтым рабіць.

100 балаў па рускай мове

Мінчанка Кацярына Макеіч, выпускніца мінскай гімназіі №38, атрымала 100 балаў па рускай мове. Каб набраць іх, дзяўчына цэлы год займалася ў рэпетытара.

Кацярына Макеіч — злева / vk.com

— Калі я ўбачыла, што набрала максімальны бал, я была ў шоку. Я была ўпэўненая, што набяру 90+, але 100 балаў здаваліся чымсьці вельмі далёкім! Так што я нават некалькі разоў пераправярала вынік.

На працягу апошняга года я рыхтавалася ў групе Соф'і Луцэвіч. Шчыра кажучы, прыйшлося выдаткаваць вельмі шмат часу і сіл. Але затое з тэстам я справілася ўсяго за 25-30 хвілін, пераправерыла заданні і выйшла раней прызначанага часу.

— На забавы і сяброў час заставаўся?

— Мой вольны час пацярпеў, але не занадта моцна. Магчыма, мне пашанцавала: выкладчыца адукавана ўсё тлумачыла, не трэба было потым сядзець і спрабаваць вывучыць адно правіла некалькі гадзін.

Я працягнула чытаць, слухаць музыку, пісаць невялікія вершыкі — тыя заняткі, якія залежаць толькі ад наяўнасці вольнага часу.

Акрамя рускай мовы, дзяўчына здавала таксама матэматыку і англійскую мову. Кацярына раздумвае пра паступленне ў БНТУ на кіраванне дызайн-праектамі на прамысловых прадпрыемствах, але "пакуль дакладна не вызначылася".

— Што да прафесіі, то я стараюся не будаваць планаў на далёкую будучыню, таму што не ведаеш, што можа адбыцца. Вядома, хочацца знайсці добрую высокааплатную працу, аднак для гэтага трэба спачатку добра павучыцца.

Планую заставацца ў Беларусі, таму што лічу, што і тут хапае магчымасцяў. Праўда, трэба іх знайсці.

99 балаў па грамадазнаўстве

Антону Макранчуку, выпускніку мінскай гімназіі, не хапіла да 100 усяго толькі аднаго бала. Але хлопец усё роўна вельмі задаволены.

Антон Макранчук / vk.com

— Пасля здачы экзаменаў у школе я ўжо пачынаў лічыць, колькі балаў трэба на платнае і колькі будзе каштаваць навучанне... Гэта пытанне вельмі ўжо выбіла мяне з каляіны. Таму сказаць, што бал быў прыемным сюрпрызам — не сказаць нічога.

— У чым усё-ткі памыліліся?

–– Дакладна ведаю, гэта было пытанне А36, звязанае са зместам Канстытуцыі Беларусі.

— Як у вас з'явілася цікавасць менавіта да грамадазнаўства?

— Усё праз тое, што я цікаўлюся нашым палітычным жыццём і ўсім з гэтым звязаным. Так грамадазнаўства стала маім любімым прадметам. А потым і іспытам, які мне неабходны для паступлення.

Антон пакуль не ўпэўнены, куды будзе паступаць. Акрамя грамадазнаўства, ён здаў рускую і англійскую мовы — вынікамі таксама застаўся задаволены. Балаў напэўна хопіць для паступлення на бюджэт.

— Я, вядома, рыхтаваўся да ЦТ: хадзіў на спецыяльныя курсы. Я дакладна не той чалавек, які здольны цалкам прысвяціць сябе вучобе, але адмовіцца ўсё ж такі давялося ад многага. Ды яшчэ і вучоба ў школе, і школьныя экзамены... На гэта ішло іншы раз больш часу, чым на падрыхтоўку да ЦТ.

— Якія планы на будучыню? Ёсць думкі наконт кар'еры?

— Пакуль што планы далей паступлення не заходзяць. Вырашаю праблемы па меры іх паступлення. Пакуль не мару пра топавыя юрыдычныя фірмы. Але я ўжо даўно для сябе вырашыў, што сваё жыццё буду будаваць у Беларусі. Прынамсі, па сваёй волі з'язджаць не збіраюся.

100 балаў па матэматыцы

100 балаў па матэматыцы набраў Мікіта Стругальскі, выпускнік ліцэя БДУ. Як яму гэта ўдалося?

Мікіта Стругальскі — справа / vk.com

— Да матэматыкі я рыхтаваўся самастойна да сакавіка. Пачаў з таго, што купіў неабходныя зборнікі і запісаўся на факультатыў па падрыхтоўцы да ЦТ у ліцэі. Але чым менш заставалася часу да ЦТ, тым лепш я разумеў, што трэба рыхтавацца больш старанна. Таму ў сакавіку запісаўся да рэпетытара, каб прарашаць больш тэстаў, — расказвае Еўрарадыё Мікіта. — У апошнія некалькі тыдняў перад ЦТ я ледзь не кожны дзень рашаў тэсты, але не магу сказаць, што на гэта ішоў увесь вольны час. Я стараўся аддаваць час сябрам і на дачу некалькі разоў выбіраўся.

Паступаць Мікіта плануе ў БДУ, са спецыяльнасцю яшчэ не вызначыўся. Акрамя матэматыкі, здаваў рускую мову і фізіку. 100 балаў па матэматыцы для Мікіты не сталі такой ужо нечаканасцю.

— Першыя надзеі на магчымыя сто балаў у мяне з'явіліся пасля тэста ўвечары, калі я даведаўся, што правільна рашыў апошнюю задачу В12. Заставалася толькі спадзявацца на тое, што я не дапусціў дурных вылічальных памылак у астатніх задачах.

— Якая рэакцыя была?

— Я даведаўся пра вынік, калі быў на дачы. Адразу расказаў пра яго бацькам, бабе і дзеду. Усе былі вельмі рады, вядома.

Мікіта — спартсмен, займаецца футболам, баскетболам і настольным тэнісам. Раней гуляў у камандзе БАТЭ, але гэта займала занадта шмат часу, і ён зрабіў выбар на карысць вучобы.

— Яшчэ я скончыў музычную школу па класе фартэпіяна, захапляюся гульнёй на барабанах. Нягледзячы на тое, што гэты навучальны год быў вельмі важны для мяне, я стараўся аддаваць час і сваім інтарэсам.

 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.