"Усё ідзе ў печку" — да палітзняволенай Дар'і Чульцовай не даходзяць лісты

Да палітзняволенай журналісткі Дар'і Чульцовай не даходзяць лісты, расказала яе мама Наталля. Яна на гэтых выходных бачыла дачку. Ім далі спатканне.

"Лісты дачка не атрымлівае зусім. Усё ідзе ў печку", — прыводзіць словы Наталлі "Народная воля".

У цэлым, паводле яе слоў, самаадчуванне ў Дар'і добрае, выглядае яна нядрэнна, "стала зусім дарослай".

Наталля таксама расказала, што ў калоніі Дар'я шмат чытае і чакае вызвалення. Да выхаду на свабоду ёй засталося 4 месяцы. "Мы разумеем, што яны будуць самымі складанымі", — адзначае мама журналісткі.

Нагадаем, карэспандэнтак польскага тэлеканала, які асвятляе падзеі ў Беларусі, Кацярыну Андрэеву і Дар'ю Чульцову затрымалі 15 лістапада 2020 года. У той дзень яны вялі прамы эфір з акцыі пратэсту на "Плошчы Перамен" у Мінску. Пазней суд Фрунзенскага раёна Мінска прызнаў дзяўчат вінаватымі ў арганізацыі групавых дзеянняў, якія груба парушаюць парадак (арт. 342 КК РБ) і асудзіў іх на два гады пазбаўлення волі ў калоніі агульнага рэжыму.

Чульцова адбывае пакараньне ў жаночай калоніі №4 у Гомелі. А Андрэеву перавялі ў СІЗА. У пачатку красавіка стала вядома, што яе абвінавачваюць у здрадзе дзяржаве (ч. 1 арт. 356 Крымінальнага кодэксу). Пра гэта ў сацсетках напісаў яе муж Ігар Ільяш. Андрэевай пагражае да 15 гадоў пазбаўлення волі. Новы суд, са слоў Ільяша, можа адбыцца ўжо ў траўні.