Уладзімір Някляеў выйшаў з "Гавары праўду"

Лідар грамадзянскай кампаніі "Гавары праўду!" Уладзімір Някляеў заявіў пра свой выхад з апазіцыйных структур. У сваёй заяве кандыдат у прэзідэнты 2010 года патлумачыў прычыну тым, што за два гады беларуская апазіцыя не змагла дамовіцца пра адзінага кандыдата ў прэзідэнты на выбары 2015 года.

"У сувязі з гэтым заяўляю аб сваім выхадзе з апазіцыйных структур, у тым ліку з грамадзянскай кампаніі "Гавары праўду!", актывістам якой я назаўжды ўдзячны за працу і падтрымку. Незалежнасць і дэмакратычная будучыня Беларусі застаюцца для мяне найважнейшай каштоўнасцю. Дзеля гэтага я буду працаваць і далей", — перадае БелаПАН словы палітыка.

Дарэчы, з усіх апазіцыйных палітыкаў Някляеў мае найбольшы рэйтынг паводле апошніх даследаванняў Незалежнага інстытута сацыяльна-эканамічных і палітычных даследаванняў (Літва). Яго электаральны рэйтынг склаў 7,6% у адкрытым апытанні і 9,4% у закрытым.

Апазіцыйным арганізацыям дагэтуль не ўдалося дамовіцца пра вылучэнне адзінага кандыдата. А на пасяджэнні "сямёркі" 8 красавіка не ўдалося дасягнуць пагаднення аб правядзенні кангрэса дэмсілаў.

Нагадаем, што ад "Гавары праўду" кандыдатам у прэзідэнты вылучаюць актывістку кампаніі Таццяну Караткевіч. Яе кандыдатуру падтрымала і Партыя БНФ.

Фота — svaboda.org