Улады рыхтуюць пераход да прагрэсіўнага падаткаабкладання

З прыняццем чарговых паправак у Падатковы кодэкс Беларусь пяройдзе ад плоскай шкалы да элементаў прагрэсіўнага падаткаабкладання. Пра гэта ў эфіры БТ заявіў намеснік кіраўніка адміністрацыі Лукашэнкі Максім Ермаловіч. Папраўкі прадугледжваюць увядзенне павышанай стаўкі падатку для забяспечаных беларусаў. "Гэта сапраўды змяненне істотнае", — падкрэсліў Ермаловіч.

Нагадаем, на працягу многіх гадоў даходы грамадзян у Беларусі абкладаліся падаткам па адзінай стаўцы ў 13%. Між тым, праект змяненняў у Падатковы кодэкс, які быў апублікаваны ў пачатку кастрычніка, прадугледжвае ўвядзенне стаўкі падаходнага падатку ў 25% для беларусаў, якія зарабляюць больш за 200 тысяч рублёў у год. Але гэтая стаўка будзе прымяняцца толькі да сумы, якая перавышае 200 тысяч рублёў.

"Гэта значыць, падатковая нагрузка для людзей з такім узроўнем даходу яна не становіцца 25%. Гэта ўсё роўна тыя ж 14-15%, калі суаднесці суму падатку з агульным прыбыткам фізічнай асобы. Але ўсё роўна гэта элемент прагрэсіўнага падаткаабкладання", — сказаў Ермаловіч.

Па яго словах, падвышаная стаўка закране каля 2000 чалавек. Але ён папярэдзіў, што гэта толькі першы крок у гэтым кірунку. "Мы пачынаем ўкараняць элементы прагрэсіўнага падаткаабкладання ў сістэму, і, вядома, сістэма будзе мяняцца",— сказаў ён. Для бюджэту сабраныя з забяспечаных людзей падаткі па падвышанай стаўцы складуць парадку дадатковых 10-20 млн рублёў даходу. Гэта менш за 1% для шматмільярднага бюджэту краіны, дадаў Ермаловіч.