Уладальнікаў будынка, дзе быў штаб Бабарыкі, вінавацяць у нявыплаце падаткаў
Дэпартамент фінансавых расследаванняў Камітэта дзяржкантролю пачаў крымінальную справу на службовых асоб ЗАТ "Белцяжмаш", паведамляе прэс-служба КДК.
Па справе затрыманыя пяць чалавек, у тым ліку кіраўнік кампаніі. Іх падазраюць ва ўхіленні ад выплаты падаткаў у асабліва буйным памеры. Паводле КДК, гаворка ідзе пра больш як 6 мільёнаў рублёў.
Напярэдадні стала вядома, што сілавікі прыйшлі ў офісы групы кампаній "Белцяжмаш", якімі кіруюць Ігар, Аляксандр і Дзмітрый Анішчанка. Таксама ператрусы адбыліся і дома ў Анішчанкаў.
У адным з будынкаў, які належаў "Белцяжмашу", здымаў офіс у арэнду штаб Віктара Бабарыкі (вул. Веры Харужай, 25/1). Пазней там засядала і Каардынацыйная рада. На мінулым тыдні ў гэтым офісе адбыўся ператрус, сілавікі канфіскавалі тэхніку і дакументы, а памяшканне апячаталі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
