Украіна абвяргае заяву Лукашэнкі, што адмовілася прыняць "замініраваны" Ryanair

26/05/2021 - 16:24

"Украэрарух" абверг заяву Аляксандра Лукашэнкі, быццам аэрапорты Кіева і Львова 23 траўня адмовіліся прыняць "замініраваны" самалёт Ryanair.

Прэс-сакратар "Украэраруху" Аксана Вожыгава заявіла ў каментары 24tv.ua, што паведамленне аб неабходнасці прыняць самалёт з выбухоўкай ім не паступала.

Кіраўнік прадпрыемства Андрэй Ярмак сказаў, што на працягу 25-хвіліннага знаходжання самалёта ў Львоўскім раёне палётнай інфармацыі экіпаж вёў перамовы з дыспетчарамі ў штатным рэжыме. Дыспетчары ні з якіх крыніцаў не атрымлівалі паведамленні пра няштатную сітуацыю на борце.

Тое самае журналістам сказалі ў прэс-службе аэрапорта "Кіеў".

Лукашэнка заявіў, быццам паведамленні пра замініраваны самалёт атрымалі аэрапорты Кіева, Львова, Вільні ды Варшавы, але ніхто не пагадзіўся яго прыняць.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.