У ЗША пакуль не бачаць прыкмет перамяшчэння ядзернай зброі ў Беларусь
Ракета для комплексу "Іскандэр" / Reuters
У ЗША пакуль не бачаць прыкмет перамяшчэння ядзернай зброі ў Беларусь, а таксама падрыхтоўкі да такога перамяшчэння. Пра гэта заявіў на брыфінгу афіцыйны прадстаўнік Пентагона Джон Кірбі.
"Мы не бачылі ніякіх прыкмет таго, што перамяшчэнне ядзернай зброі хутка пачнецца ці ўжо адбываецца", – сказаў Кірбі. Паводле яго слоў, у Вашынгтоне не бачаць таксама ніякіх прыкмет, якія прымусілі б амерыканскія ўлады змяніць ядзерную пазіцыю краіны. Гэта датычыцца і ядзернай гатоўнасці, і патэнцыялу. Заявы Аляксандра Лукашэнкі аб ядзернай зброі ён назваў безадказнымі.
Нагадаем, 25 мая міністры абароны Беларусі і Расіі Віктар Хрэнін і Сяргей Шайгу падпісалі дакументы аб размяшчэнні ў нашай краіне тактычнай ядзернай зброі. А на мінулым тыдні прэзідэнт Расіі Уладзімір Пуцін на сустрэчы з Лукашэнкам заявіў, што падрыхтоўка аб'ектаў для захоўвання ядзернай зброі ў Беларусі завершыцца да 7-8 ліпеня. Пасля гэтага яна будзе дастаўлена ў нашу краіну.
